蝦仁腸仔蛋炒飯

噚晚我哋掛住飲冬瓜湯兼食埋湯渣，

攪到成煲飯(我洗咗2杯米)，

都冇咩點食過呀!

今朝午餐就全部用嚟整炒飯食喇!

摷下雪櫃嘅物資，

煮咗呢鑊蝦仁腸仔蛋炒飯呀!

呢度我哋兩個人都係食唔哂，

睇嚟今晚都係要食炒飯呀!

材料: 冷飯約4~5碗、急凍蝦仁200g、腸仔4條、雞蛋2隻、菜芯6條

醃料: 鹽少許、胡椒粉少許、麻油少許

做法: 急凍蝦仁解凍後用廚紙索乾水份，落醃料醃15分鐘；

雞蛋打勻備用；腸仔切片；菜芯切粒；

燒熱油鑊落蝦仁，煎至蝦仁轉色或熟後，加入腸仔和菜芯爆香後盛起；

原鑊落少許油倒入蛋液快手炒散，落冷飯炒勻後，

盡量將冷飯炒至鬆散後，加少許鹽和蒸魚豉油調味後，

最後落埋蝦仁、腸仔和菜粒炒勻便成。

  

大家可以入嚟Facebook讚下我新開嘅Fans專頁呀!
雀后(添飯)Facebook Fan Page