金銀蒜香辣蝦

我見呢排疫情開始冇咁嚴重，

所以今日又可以落街買餸了；

買餸之前我緊係又去公園行番幾個圈先啦!

雖然戴口罩行公園好悶熱又辛苦，

但為咗家人健康，

一定要好好保護自己呀!

今日買咗急凍蝦，

整咗碟金銀蒜香辣蝦，

超級惹味好送飯呀!

材料: 急凍蝦1磅、蒜蓉、薑蓉、辣椒仔2隻、生粉2湯匙、

炸蒜蓉適量、紹酒少許

醃料: 鹽半茶匙、胡椒粉適量

調味: 豉油1.5湯匙、糖1茶匙、麻油

做法: 急凍蝦解凍後，去蝦眼、鬚和挑蝦腸，並係蝦背界一刀(易入味)；

用廚紙索乾蝦水後，落醃料醃30分鐘；

將蝦沾上生粉，放入油鑊中半煎炸至蝦煎兩面轉色，

加入薑蓉、蒜蓉和辣椒仔炒勻後贊少許紹酒，落埋調味快手炒勻，

讓蝦沾滿豉油汁後上碟，灑上炸蒜蓉係蝦面便成。

~食得辣嘅朋友仔，可以加埋辣椒油或花椒油一齊炒呀!

~加埋蔥粒會香D和色水靚D，可惜屋企冇蔥，冇得加呀!

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page