糖醋蓮藕小丸子(氣炸)&香煎蓮藕餅

前幾日見朋友仔整蓮藕餅，

挑起我條為食筋添!

今日即刻落街買齊材料整嚟食喇!

我鐘意食酸酸甜甜，

小魔怪就鐘意食香香脆脆，

所以整咗呢兩碟糖醋蓮藕小丸子(氣炸)和香煎蓮藕餅呀!

今整只係用咗半份蓮藕餡整咗2個餸，

明天仲有得食。

材料: 蓮藕1節、豬肉碎半斤、魚肉$10、雞蛋1隻

調味: 豉油1湯匙、鹽1茶匙、糖1茶匙、生粉1茶匙、麻油、胡椒粉

做法: 蓮藕去皮刨絲，輕輕用手揸掉部份蓮藕汁(蓮藕太多汁餡料會出水)；

準備一個大盆，將蓮藕絲、豬肉碎、魚肉、雞蛋和調味攪勻(用手攪會均勻D)；

放入雪櫃雪半日。

香煎蓮藕餅:

做法: 燒熱易潔鑊落油，將蓮藕餡用手搓成圓形壓平，

用中小火慢慢煎一面金黃色後，先反轉煎另一面，

煎至兩面金黃色或熟透便成。

(沾少少水係手心，咁搓餡料時就唔會黐手架啦!)

糖醋蓮藕小丸子:

糖醋汁: 糖3茶匙、香醋2茶匙、豉油1茶匙、水2湯匙、茄汁3茶匙

做法: 將蓮藕餡搓成圓波波，放入氣炸鍋內用200度氣炸15分鐘；

將氣炸蓮藕小丸子和糖醋汁煮滾至汁濃後，灑上蔥花便成。

~可自行調較糖醋汁嘅酸甜度架!

大家可以入嚟Facebook讚下我新開嘅Fans專頁呀!

  

雀后(添飯)Facebook Fan Page