蒜蓉香煎雞扒

呢排跟小魔怪食得清淡嘢多，

襯佢今日唔返嚟食飯，

整番D香口嘢食下先得；

今餐就煎咗兩塊雞扒嚟食，

專登搵D重物壓在雞扒上，

咁雞皮和雞肉都會貼住鑊煎，

除鎖住雞肉汁外，

更煎到塊雞皮脆卜卜，

好惹味架!

材料: 雞扒2塊、蒜蓉

醃料: 鹽1.5~2茶匙、雜香草半湯匙、黑椒適量、橄欖油少許

做法: 雞扒解凍後用廚紙索乾水份，用刀把雞扒厚肉位置界幾刀，

落醃料和蒜蓉醃半日(醃隔夜仲入味)；從雪櫃取出雞扒放室溫1小時，

燒熱鑊落好少油，先煎帶皮雞扒約5分鐘(用重物壓在雞扒上)，

待雞扒出油後，後轉煎另一面約5分鐘(用重物壓在雞扒上)，

最後再反轉煎帶皮雞扒，咁塊雞皮就更加脆口啦!

~記得用筷子插入厚身雞肉面，插得穿和冇血水出就代表雞扒熟，

插唔穿和仲有血水出，就要煎多1~2分鐘；

~燒熱油鑊後，記得開中火慢慢煎雞扒，唔係D蒜蓉就會好易燶，燶就有苦味架啦!

~感覺上雞扒醃咸少少會好食D呀!(個人感覺)

     

 大家可以入嚟Facebook讚下我新開嘅Fans專頁呀!

 雀后(添飯)Facebook Fan Page