過年時買咗一包大冬菇，
冬菇好厚肉，
炆嚟食係一啖食唔哂架!
老公和大小魔怪都唔係咁鐘意食咁大隻嘅冬菇，
好彩剩得唔多約12隻左右；
所以噚日就炆咗佢，
8隻冬菇放入冰箱雪住佢，
咁就隨時都有得食，
其餘4隻就切片嚟炆伊麵。
因為要留番俾大魔怪食，
所以我用咗素蠔油炆冬菇呀!
但個人覺得，
都係用李錦記舊裝蠔油炆冬菇，
先至係最好食D囉!
炆冬菇
材料: 冬菇12隻(大)、薑2片、生粉水
調味: 素蠔油2湯匙、豉油大半湯匙、老抽1湯匙、冰糖粒適量、麻油少許
做法: 冬菇浸軟去蒂，留浸冬菇水；
燒熱油鑊落薑片和冬菇爆香，落調味和2浸冬菇水2碗煮滾，
轉小火慢慢炆30~45分鐘(視乎冬菇大細而定)，加入生粉水埋芡汁便成。
素炒伊麵
材料: 伊麵3個、韭黃$2、有機芽菜$5、蠔油冬菇4隻(切片)、麻油少許
調味: 素蠔油1湯匙、豉油1湯匙、老抽適量、香菇粉1茶匙、糖1茶匙
做法: 燒熱水落伊麵灼至軟身後撈起及沖水(我覺得會冇咁油)；韭黃切段；
燒熱油鑊加入蠔油冬菇片、伊麵、調味和1.5碗水炆至差不多收汁，
落埋有機芽菜和韭黃撈勻至芽菜熟後，灑少許麻油撈勻便成。
大家可以入嚟Facebook讚下我新開嘅Fans專頁呀!
沒有留言 :
張貼留言
如果大家覺得我煮嘅餸菜啱哂口味嘅話，不妨留個言，鼓勵下我啦!