黑椒洋蔥炆咸豬手

大大話話冇整呢黑椒洋蔥咸豬手已經有好幾年，

幾兩日見到百佳有咸豬手賣，

見佢又幾大隻，

所以就買咗隻返嚟，

襯昨日慶祝父親節，

整咗俾大家食喇!

食後感: 

大家反應話好好食有水準，

但佢哋個個都鐘意食辣，

嫌唔夠辣喎!

但其實我已經落咗好多黑椒碎，

咁下次有機會再整就再落多D黑椒碎啦!

材料: 咸豬手1隻、蕃茄2個(大)、薯仔2個、甘筍1條、香葉3片、

洋蔥1個(大)、蒜蓉

調味: 黑椒醬2大湯匙、蠔油1湯匙、老抽3~4湯匙、糖2.5茶匙、黑椒碎1湯匙

做法: 將咸豬手解凍，放入鍋內加水煮滾出水10分鐘後沖洗乾淨備用；

蕃茄切粒；薯仔和甘筍去皮切件；洋蔥去皮切絲；

燒熱鍋落少許油，落蕃茄快炒炒出茄油，加入薯仔和甘筍炒勻後，

落咸豬手、撕碎嘅香葉和8碗熱水煮滾，轉小火慢慢煲1小時後熄火，

唔好開蓋繼續焗至豬手湯涼後，小心撈起咸豬手備(咸豬手湯留用)；

另燒熱油鑊加洋蔥炒至軟身，落蒜蓉和調味炒勻後，

加入咸豬手和4~5碗咸豬手湯煮滾，期間不斷將黑椒汁淋在咸豬手面；

將黑椒咸豬手轉到小鍋內，慢慢炆煮30分鐘，期間需要將咸豬手翻轉；

將咸豬手上碟後，再燒熱鍋內黑椒汁，加生粉水埋芡汁，

將黑椒汁淋在咸豬手面便成。

~黑椒汁要咸中帶甜兼辣辣哋先好食，所以記得要調啱自己鐘意嘅味道呀!

~煲完咸豬手嘅湯千祈唔好浪費，加少少鹽調味，

就係咁碗好飲嘅蕃茄薯仔湯嚟架啦!

~呢個黑椒洋蔥咸豬手雖然做嘅功夫比較多，但做起之後係家人面前，

用刀叉慢慢切開隻咸豬手一齊食，個氣氛真係好好架!

 

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page