蒜香辣菜脯

今日無無聊聊，

炒咗碗蒜香辣菜脯，

諗住俾大魔怪拎返公司加餸；

今朝煮個麵試下加少少做配菜，

嘻嘻，

一食唔停得口添，

睇怕大魔怪呢碗加餸都冇咩著落喇!

材料: 菜脯6兩、辣椒乾5隻、獨子蒜頭2個

調味: 糖1茶匙、麻油少許

做法: 菜脯沖沖水(唔使浸)，用刀慢慢切成粒粒；蒜頭和辣椒乾切碎；

燒熱鑊(不需落油)加菜脯粒炒至乾身或有微微焦香後盛起；

原鑊落約3湯匙油，加入蒜蓉和辣椒乾炒香，落菜脯粒炒勻，

等油充分沾係菜脯面，加入糖和麻油調味後熄火，

待涼可將菜脯粒放入玻璃樽或膠盒內存放入雪櫃1~2星期架!

~今次呢個辣菜脯係炒俾食素嘅大魔怪，唔食素嘅朋友，

可以加埋蝦米落去炒，咁就變成蒜香辣蝦米菜脯喇!

~呢個辣菜脯，可以用嚟拌麵、撈飯或炒菜都得架!

而炒粒粒時加埋辣菜脯，正呀!

~菜脯唔使浸，因為菜脯本身有咸味，加少少糖中和番佢就得，

所以落糖之後記得試味，唔食得咸嘅朋友就要按自己口味加糖喇!

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page