馬來西亞肉骨茶+粉腸

今日獻出我人生嘅第一次，

就係洗粉腸喇!

平時出街就食得多，

但要自己一手一腳整呢，

唔講得笑真係有D怕怕架!

點解要買粉腸嚟食呢???

因為小魔怪囉，

佢話係馬來西亞食肉骨茶，

一定要有粉腸先好食喎!

材料: 排骨$40、粉腸$27、獨子蒜頭5個、馬來西亞肉骨茶包1包、醋1湯匙

洗粉腸: 鹽3茶匙、生粉3茶匙、醋1湯匙x3次

洗粉腸方法: 首先用鹽、生粉和醋洗粉腸表面，連續洗粉腸3次，

然後打開粉腸口，灌水入粉腸內，粉腸會由頭
慢慢膨脹到尾，

粉腸尾端會洗出黃色嘅水，重覆做2~3次，壓出粉腸內嘅水後，

燒熱水加粉腸和白醋1湯匙，出水10分鐘撈起粉腸，

剪去粉腸上嘅白色筋膜；

調味: 老抽半湯匙、生抽2湯匙、蠔油1湯匙

做法: 排骨洗淨後，放入鍋內加水煮滾，出水8~10分鐘後撈起；

燒熱8碗水，加入排骨、粉腸、獨子蒜頭和馬來西亞肉骨茶包，

先煲滾15分鐘，加埋調味後轉小火煲1小時便成。

~今次加咗蠔油，所以冇落鹽；如果唔加蠔油，就要落鹽調味喇!

~煲粉腸最好唔好切開嚟煲，一大揪放入湯內，食時用較剪剪開嚟食。

~揀粉腸方面，肉檔老闆會係切開粉腸中間，睇粉腸內有冇黑色污物，

有嘅話就代表呢條粉腸煮出嚟之後會苦架!

~買粉腸要係早上去買，下午買就可能唔夠新鮮喇!

~食粉腸時，點豉汁加胡椒粉和麻油食就最正啦!

  

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page