韓式海鮮煎餅

之前係街市買咗1份椰菜(2個)返屋企，

切咗半嚟包素春卷外，

今日用椰菜整咗韓式海鮮煎餅喇!

呢排我咁較鐘意整韓式小食，

因為勁想去韓國玩囉!

期待明年3個月釜山之旅!

材料: 椰菜1/4個、甘筍1/3條、蝦仁20隻、洋蔥1/4、韭菜適量、

蛋2隻、炒香芝麻(可以唔落都得)

沾醬方面: 豉油1湯匙、白醋1湯匙、蒜泥1茶匙、糖1.5茶匙、麻油少許、

椒辣粉少許、芝麻適量、水1湯匙

粉漿做法: 麵粉(中筋)8湯匙、蕃薯粉(2湯匙)、鹽半茶匙、糖半茶匙、

胡椒粉少許、麻油少許、水8湯匙(粉漿唔好太浠)

做法: 將椰菜、甘筍和洋蔥切絲；蝦仁解凍；

韭菜切段；雞蛋分個碗逐隻發勻；

把粉漿攪拌好後至冇粒粒，將其餘材料加入粉漿內拌勻(蛋液除外)；

燒熱鑊落多少少油，倒入海鮮粉漿，用中小火慢慢煎至定形後，

淋上蛋液(每一個煎餅加1隻蛋)，反轉煎另一面，

上碟後灑上炒香芝麻便成。

~落鑊煎個海鮮餅時，盡量舖平成個煎pan嘅話，咁就會煎成薄餅；

而我鐘意食厚餅，就咁微微分開D材料就可以喇!

~今次個粉漿度加咗蕃薯粉，因為我想個海鮮煎餅有脆脆嘅口感，

冇嘅話全部落麵粉(10湯匙)加泡打粉1茶匙落個粉漿度；

~亦可買韓國pancake粉代替個粉漿架!

~海鮮方面，可加蝦、蟹柳、魷魚、蠔仔、蜆肉、帶子呀!

~呢個粉量可以做到2個煎餅呀!

大家可以入嚟Facebook讚下我新開嘅Fans專頁呀!

雀后(添飯)Facebook Fan Page