柱候支竹蘿蔔炆牛展牛筋

通常炆牛腩或牛筋條，

凍咗會有層厚厚嘅油浮係面，

不過炆牛展就唔會有呢個情況出現喇!

唔信???

妳哋都試下啦!

話時話，

呢個餸我至愛唔係牛展，

而係蘿蔔和支竹呀!

材料: 牛展2條、急凍牛筋1磅、蘿蔔1條、支竹2條、薑4片、八角1粒、

乾蔥頭1個(切絲)、紹酒、熱水2碗、老抽1湯匙

調味: 柱候醬2湯匙、磨豉醬1湯匙、豉油1湯匙、冰糖1粒

做法: 燒熱水放2片薑和紹酒落牛展出水10分鐘，取出沖洗後將牛展切件；

熟牛筋洗淨後切件；蘿蔔去皮切件；支竹浸軟切段；

凍鍋落油(中火)，落2片薑、乾蔥絲、八角、柱候醬和磨豉醬先爆香，

加入牛展炒勻後贊酒(半蓋)，落豉油、冰糖和熱水2碗，

煮滾後轉小火慢慢炆45分鐘；落蘿蔔、牛筋和老抽調色，

先炆30分鐘(記得先轉中火煮滾後轉最小火繼續炆)；

然後加埋支竹炆多15~20分鐘，熄火後唔好開蓋繼續焗下佢，

食先再翻熱10分鐘便成。

(如果用普通煲炆嘅話，要落多1~2碗水和炆耐少少啦!)

(呢個餸炆定隔日食仲入味呀!)

 

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page