今日年廿九，
明天已經係年初一(今年冇年卅十晚)，
我和老公分工合作，
我去買定餸準備明天初一煮齋菜，
而佢就慢慢收拾屋企，
等孫仔返嚟屋企食飯呀!
我摷到雪櫃有金沙骨，
就煮咗呢碟糖醋排骨做午餐呀!
今日食得簡單，
四季豆煮肉片，
5蚊扎四季豆，
加多十零蚊豬肉，
咁又一餐喇!
今年情人節，
梗係要同我嘅新情人孫仔過啦!
順便攞埋我噚日整嘅蘿蔔糕過去俾大人和新抱仔試下；
朱鎧仁小朋友已經5個月大喇!
開始認人，
今日都唔例外，
好彩扭計扭咗10分鐘左右就收咗聲，
仲開始同我哋玩添，
玩完就瞓覺，
真係好抵打架!
我哋冇留係度食晚飯，
但煎咗D蘿蔔糕和芋頭糕食呀!
噚日我唔多舒服，
本來冇諗住整蘿蔔糕，
但買哂材料，
唔整好似嘥咗咁，
今日見有番D精神，
所以拿拿臨開工。
2月9日星期一
我和老公兩個人又返咗惠州，
因為其中一間房間訂造嘅窗台牀，
安裝好啦!
買樓時銷售姐姐幫我哋搵埋裝修，
我哋只要講哂我哋要求，
傾啱價錢就拿拿聲開工，
裝修咗3個半月，
我和老公終於可以入住喇!
今日朱家提早團年，
母親大人和妹妹一家都入咗嚟天水圍齊齊團年呀!
朱鎧仁小朋友第一次返嚟爺爺嫲嫲屋企，
有D認地方喊咗一陣，
好彩我呢個做嫲嫲嘅氹得掂佢，
咁先有番D笑容咋!
今日6餸1湯，
白飯任裝。
之前炸腰果剩咗唔少油，
裝出平時嚟用嚟煮餸，
今日就用佢嚟半煎炸雞塊，
脆卜卜，
細仔最鐘意食呀!
今日我突然間好想食炆米粉，
我鐘意買呢隻天鵝牌米粉，
佢炆、炒和放湯都得架!
今次用咗椰菜、甘筍、豬肉片和雞蛋炒埋一碟，
兩個米粉炆咗一大鑊，
我和老公食足兩餐呀!
今年炸腰果，
炸咗1斤印度腰果加400克越南腰果，
炸咁多今年肯定夠食啦!
我哋真係好少食豆豉鯪魚，
一年食一兩次咁大把，
但唔知點解總會有幾罐豆豉鯪魚係屋企，
見有罐就嚟到期，
拿拿臨攞出嚟炒油麥菜。
過多兩星期就係農曆新年，
係時候要準備賀年食品，
前兩日我就開始蒸定花膠喇!
蒸完嘅花膠分裝數袋包好放入冰箱，
過年煮餸隨時都有得食啦!
我都好耐冇整過香口嘢嘅餸喇!
所以買咗2條一字排，
叫肉檔哥哥幫我將一字排斬大件，
整咗呢碟蒜香排骨，
我食咗2件，
過過口癮呀!
噚日，
係我哋黃氏提早團年大日子，
順便慶祝妹妹1月份生日，
所以我哋早一個月去禾輋海港酒家訂咗間房，
打牌兼食晚飯，
朱鎧仁小朋友真係好可愛，
我哋個個爭住抱佢冇問題外，
見到手機對住佢又識得望鏡頭，
好得意呀!
另外果半邊雞，
我就整咗蒜香香草焗雞，
老公鐘意食脆卜卜雞皮，
用氣炸鍋焗就最正啦!
今日買咗一隻雞，
斬開咗一半，
一半整咗呢碟蟲草花冬菇雲耳蒸雞，
呢個餸冬菇雲耳係我至愛，
好好食呀!
今日佳寶又做8折1星期，
附近肉檔新開張買豬肉又有折，
我哋呢D主婦最開心就係又慳到錢，
折斧頭錢又有著落喇!
1月25日星期日
惠州間新屋10月開始裝修，
呢幾日終於完成喇!
今日我和老公經羅湖返惠州，
去其他地方辦完私事後，
就返屋企啦!
今晚得我和老公兩個人食飯，
簡單煮咗一個餸，
就係黑椒洋蔥炒雞球喇!
呢個可以撈黑椒汁送飯，
濕濕哋好惹味架!
今日摷雪櫃，
見到有包菜脯乾，
好似係之前去大陸旅行時買嘅，
咁啱雪櫃仲有半碗豬肉碎，
加埋3隻雞蛋，
煮咗呢碟菜脯肉碎炒雞蛋呀!
老公鐘意食魚，
見到街市有黃立倉賣$50條，
拿拿臨買咗條返屋企，
响魚身鎅幾刀和落少少鹽醃佢，
之後落薑慢慢煎熟佢後，
爆香蒜頭豆豉，
煮個薄薄豉油、蠔油和糖嘅芡汁，
將黃立倉回鑊煮至汁濃便成。
噚日買咗$50梅頭豬肉，
梅頭肉有少少肥，
用嚟醃叉燒就用啱喇!
噚日，
我哋一家五口去咗坪輋雲泉仙館拜祭奶奶，
之後去後門小市集買買買，
我和新抱仔都買咗唔少嘢，
真係滿載而歸呀!
午餐係度食埋齋菜先去大埔呀!
今日煲呢個蓮藕粟米排骨湯，
我上次係惠州都煲過，
當時材料都唔使￥22，
但係香港就唔得喇!
蓮藕同粟米買咗$20，
西施骨就買咗$65，
老公和細仔唔係咁鐘意紅蘿蔔，
所以今次冇加到，
我加多4片薑落去，
煲1.5小時，
落鹽和少少胡椒粉調味，
呢啖湯好清甜架!
1月14日星期三
今日我和老公齊齊返惠州，
因為新裝修嘅新屋已經完成9成9，
差大型傢俬、燃氣和網絡安裝好後，
就可以入住架喇!
今日買咗青衣柳，
佢肉質比較實肉，
我之前買開嘅鯰魚柳係淋身，
兩款比較下，
我鐘意食實肉嘅青衣柳喇!
今晚就用佢嚟整咗粟米燴魚柳，
平時整呢個餸要用好多油炸魚，
今次我就係咁二煎熟魚柳再用粟米蓉去燴佢，
咁呢個餸就冇咁肥膩喇!
前陣子，
我和老公參與健康講座~中醫護眼謂座，
講座後每位參加者都送4個湯包，
今日攞咗其中一個湯包嚟煲湯，
清補涼煲豬腱，
我另加咗圓肉和瑤柱仔，
啖湯好甜呀!
噚日朱鎧仁小朋友4個月喇!
我哋入去大埔探佢兼齊齊切蛋糕慶祝；
唔知係咪開始認人，
見到我哋嚟到即刻大喊，
流出大大粒眼淚，
哈哈，
真係好好笑，
好彩佢望多兩眼又同佢傾下計後，
朱鎧仁小朋友終於笑喇!
晚餐工人姐姐煮，
飯後切蛋糕，
朱鎧仁小朋友表情多多，
哈哈，
今日學識表演伸脷添呀!
今日煲嘅湯係竹蔗茅根雪梨馬蹄湯，
配埋海底椰、紅蘿蔔、粟米、豬腱、雞腳和蜜棗，
呢個湯有清潤袪濕利尿等功效呀!
今日咁凍天氣飲碗熱湯，
真係好舒服架!
老公超鐘意食秋刀魚，
今日見到佳寶有得賣，
1盒有4條$26，
今晚煎咗2條俾佢慢慢嘆，
佢不知食得幾滋味呀!
今日午餐食蒸水蛋，
要蒸滑滑水蛋，
一定要加夠水份先得架!
石斛蓮子百合麥冬煲豬腱，
配淮山、玉竹、龍眼肉、杞子和蜜棗，
有生津潤肺、滋陰安神、補肝明目等功效，
呢個湯煲咗2個鐘，
加鹽調味就飲得啦!
雪櫃仲有半條白蘿蔔，
用佢嚟炆魚鬆就最啱喇!
呢個餸由細食到大，
真係好送飯架!
今日又係家常便飯系列，
蒸珍珠立魚、麵豉蒸排骨和蒜蓉炒菜芯，
簡簡單單又一餐，
食飽飽就坐定定睇萬千星輝頒獎典禮，
今年唔知邊個做視帝視后呢???
今朝出咗街，
返到屋企都已經成4點幾，
拿拿臨攞D雞翼出嚟解凍，
晚餐就整咗呢碟蠔油洋蔥薯仔炆雞翼，
灼埋碟菜就食得飯喇!
2026年1月1日，
我們黃氏一家又聚埋一齊開派對喇!
今年多咗朱小B參與，
令今次派對添上歡樂，
我哋個個都爭住抱佢，
佢唔抗拒又任抱唔嬲，
笑容滿面，
開心BB一名。
