白汁蘑菇芝士焗薯仔

噚日大魔怪由宿舍搬返屋企，

唔覺唔覺佢住係宿舍差不多有9個月啦!

放暑假期間，

佢搵到份銀行暑期工，

雖然係打雜一名，

但都好吖，

唔使日日係屋企打機嘛!

大魔怪返咗嚟，

我又要多煮素食餐喇!

諗住焗緊嘢唔使理，

走咗去烚菜，

點知轉頭睇下D芝士已經燶燶哋，

所以話一心真係唔可以二用架啦!

材料: 薯仔2個、洋蔥半個、三色椒適量、白汁蘑菇湯1罐、

鹽、黑胡椒、mozzarella芝士碎

做法: 薯仔去皮切片後，浸水30分鐘去澱粉質；

洋蔥去皮切粒；三色椒切粒；將白汁蘑菇湯及半罐水先煮滾備用；

燒熱鑊落油，落薯仔片煎至兩面有少少金黃色後上碟；

原鑊落洋蔥粒快炒至熟後，落薯仔片、鹽和黑胡椒調味，

再加入白汁蘑菇汁煮至汁濃後，加入三色椒煮多1分鐘左右，

放入焗盆內灑上mozzarella芝士碎，放入焗爐焗至芝士溶便成。

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page