雀后~歡迎!歡迎蒞臨朱家天地!

唔想再食了無新意的家常菜？唔知外面的餐廳有無用地溝油？覺得下廚好難、好麻煩？定係，根本無時間下廚？無論如何，自己親手烹調的最健康、最美味同安全﹗ 幸福可以好簡單，為自己的家人洗手作羹湯，雖然平凡，卻絕對是人間美味。平凡的食材、用簡單步驟，就能令你同家人一齊感受舌尖上的幸福﹗ 雀后，自問只是一名平凡的家庭主婦，然而她每天都會用心經營，為家人送上最暖的心意，煮出一道道幸福美味。自從大小魔怪出生後，雀后從不假手於人，一家大小的飲食都是她一手包辦，由買餸醃肉到落手落腳煮，都親力親為，務求家人食得健康，食得開心﹗

2014年4月29日星期二

粟米洋蔥蘑菇燴豬扒&粟米豆腐蘑菇湯

今日好慳家，

用咗1罐粟米蓉和1罐蘑菇(小)煮咗2樣嘢，

粟米洋蔥蘑菇燴豬扒&粟米豆腐蘑菇湯，

個湯係俾大魔怪飲架，

佢話要減肥喎!

吓!

佢肥???

咁我點算呀???

粟米洋蔥蘑菇燴豬扒

材料: 梅頭豬扒4塊、洋蔥半個、蘑菇片半罐、粟米蓉半罐、蒜蓉、鹽適量

醃料: 豉油1湯匙、糖1茶匙、粟粉1茶匙、麻油少許和水1湯匙

做法: 梅頭豬扒用刀背剁鬆兩面，用醃料醃1小時；

燒熱油鑊煎豬扒兩面至焦香上碟備用；

燒熱油鑊爆香蒜蓉和洋蔥後，加入粟米蓉、蘑菇片、豬扒和1碗水，

煮至汁濃後落鹽調味便成。

粟米豆腐蘑菇湯

材料: 粟米蓉半罐、蘑菇片半罐、滑豆腐半盒、鹽適量、水2碗

做法: 將粟米蓉、蘑菇片和2碗水放入煲內煮滾後，

加豆腐(切粒)和鹽調味撈勻便成。