今日買咗半磅豬肉碎，
諗住整幾個唔同款嘅餸菜，
今日就整咗菜脯肉碎煎蛋；
呢個餸非常簡單，
適合唔知煮咩餸，
又或想加餸時，
只要有齊材料就可以整嚟食喇!
今晚食蟲草花冬菇蒸雞肉，
雞髀肉去皮去肥膏，
蒸出嚟冇咁油膩，
好健康架!
今朝10點45分我去咗元朗政府合署睇牙醫，
由於要做深層洗牙，
所以今次要打麻醉針呀!
打完麻醉針後
右邊面冇哂知覺，
就連食午餐都好困難囉!
餓咗大半日，
晚餐我就要食番夠本啦喂!
荷蘭豆炒臘肉、涼瓜炆排骨和豉油雞翼+雞腳。
大魔怪又又又感冒了，
喉嚨痛、流鼻水、喉沙兼頭痛，
睇咗醫生，
食咗藥就係咁瞓，
午餐食通粉，
晚餐我就煲咗皮蛋瘦肉粥、榨菜蒸豬肉和灼菜芯。
今日買咗1條仔腩排($29)嚟蒸豉汁排骨，
雪櫃有少少銀芽，
加埋落D排骨度一齊蒸，
灼多碟菜芯就開得飯喇!
簡單又好味道呀!
噚日買咗2扎通菜，
一扎炒咗蝦醬通菜鮮魷，
今日就整馬拉盞肉碎炒通菜，
呢個餸咸咸香香，
真係好送飯架!
上星期六係大小魔怪28歲生日，
今日約埋黃氏一家和大魔怪女朋友仔，
合共12人齊齊慶祝佢哋生日呀!
响屋企附近餅店訂咗個足料嘅生日蛋糕，
我哋訂咗2磅蛋糕$290，
但餅店造出嚟嘅蛋糕足足有5磅幾，
真係超級巨型和抵食呀!
我哋12個人只係食咗半個蛋糕，
仲剩半個蛋糕係雪櫃呀!
今日係冰箱摷到1塊雞扒，
用嚟煎又或蒸都唔夠食，
好彩有小魔怪平時食開嘅小雞胸肉，
加埋幾隻冬菇和1條臘腸，
咁就蒸咗呢碟冬菇臘腸蒸雞肉喇!
今晚晚餐雖然叫咗外賣，
但我都冇偷懶架，
煲咗我哋成家都鐘意飲嘅腐竹薏米雞蛋糖水，
食完D辣辣哋嘅嘢，
食番碗甜甜嘅糖水中和番佢呀!
今日去牛肉檔買咗$45牛肉，
叫肉檔哥哥幫我切埋D牛肉(我懶得自己切呀)，
買埋包即食榨菜，
整呢碟榨菜蒸牛肉，
灼埋碟菜芯，
咁又一餐囉!
上次返惠州，
我竟然忘記了買梅菜呀!
激C我啦!
今次用嘅梅菜係香港買，
貴係貴D，
但食住先啦!
下次返去我一定會入貨架啦!
呢排我真係好鬼懶，
好耐冇煲過老火湯呀!
今日襯大魔怪放假而小魔怪又返晏，
所以一早買齊材料煲咗呢個湯，
粉葛土伏苓牛大力地老鼠煲排骨；
近排天氣咁潮濕，
最啱就係煲呢個湯水祛骨火和祛濕呀!
今日買咗豬肉碎諗住蒸馬蹄肉餅，
點知摷到雪櫃仲有2隻土魷，
拿拿臨即刻改食法，
整咗呢碟土魷馬蹄蒸肉餅呀!
我最鐘意就係食呢個整肉餅，
好香魷魚味，
肉餅又爽爽軟軟，
一D都唔"鞋"呀!
今日大小魔怪28歲生日，
點慶祝?
大魔怪約咗女朋友仔去酒店staycation，
老公就去咗中學校友會攪嘅週年聚餐，
所以今日剩番小魔怪陪我食飯呀!
小魔怪請我食飯，
食咗$201，
我就買番D雪糕雪條請佢食呀!
噚晚除咗食雜錦鍋，
我仲買咗舊鯇魚腩$42，
用咗大頭菜蒸嚟食，
大頭菜咸咸香香又爽脆，
加埋滑滑嘅魚肉，
送飯一流呀!
今日我又要清雪櫃啦!
摷到有梅頭豬肉片、牛丸和我自己包嘅韭菜豬肉餃子，
加埋旺菜、粉絲和清雞湯，
一煲過，
有湯有菜有肉有餃子，
簡單又好味道!
呢幾日我都唔使諗煮咩餸，
因為我哋都係食雞呀!
响惠州帶返嚟果2隻走地雞，
D雞肉真係唔係人人都咬得開架!
唔講大家都唔知，
呢度只係半邊雞，
我起埋骨都咁大碟，
真係食極都食唔完呀!
今次惠州之旅，
弟婦攞咗條佢自己生曬嘅臘肉俾我哋食呀!
平時我都好少買臘肉嚟食，
因為怕咗佢哋肉質太硬，
但弟婦自己曬嘅臘肉，
炒完出嚟特別香軟，
攪到我都要破戒食咗幾片，
嘻嘻，
又真係幾好食架!
噚日係惠州返到嚟天水圍，
經過樓下菜檔見到有特價菜~芥菜，
每份$8都有成8棵架!
咁啱係返惠州前我醃定咗D咸排骨，
即刻買返屋企整煲芥菜咸排骨瑤柱湯飲下先得。
3月10日~3月12日星期五六日，
我和老公返咗惠州呀!
3年冇返去，
惠州真係變化得好大，
尤其係我哋居住嘅村屋附近，
大興土木，
興建咗好多新道路，
沿途綠化做得好好，
真係越變越靚呀!
响淘寶淘咗幾包唔同種類嘅方便醬，
今日就用其中一包紅燒醬嚟整紅燒排骨，
味道唔錯又真係好方便喎!
叉燒，
唔一定用焗爐又或用氣炸鍋整架!
今次就用個平底鑊整咗呢碟蜜汁叉燒；
平時我鐘意買梅頸肉嚟整叉燒，
今次就用咗去皮五花腩肉，
整出嚟嘅叉燒都好淋好滑架!
用呢個方法，
可用整叉燒和金沙骨添!
大魔怪好鐘意食露筍，
所以今日煎雞扒順便炒埋個蒜蓉露筍，
雞扒露筍一碟過，
慳番唔使洗多隻碟呀!
今晚得我和老公兩個人食飯，
原本想炒碟福花菜炒牛肉就算，
但一碟餸好似好少，
最後蒸多2條臘腸補數，
咁老公就唔會詐型啦!
每次炆親南乳蓮藕豆卜炆豬腩肉或排骨，
大小魔怪都會添飯架!
唔只佢哋，
我剩食豆腐卜都食到要添飯呀!
今日大魔怪女朋友仔嚟食飯，
煮咗幾個家常菜，
四餸1湯，
白飯任裝!
上星期煮餃子麵做午餐時，
大魔怪話街買餃子唔好食，
話我包嘅餃子先好食喎!
見佢講到出口，
今日我即刻買哂所有材料開工呀!
總共包咗63隻，
唔知食到幾多餐呢???
見到煮起嘅餃子粒粒脹卜卜，
又真係幾吸引架!
無端端被封咗1個多月，
我嘅facebook&instagram，
終於返嚟喇!
問我點解被封，
我都唔知道呀!@@"
今日挑起條筋，
老公和我行下屏山文物徑，
輕輕鬆鬆行路過去，
車都唔使搭，
唔錯架!
第一站~天水圍西鐵站旁~聚星樓。
