馬來西亞肉骨茶+粉腸+雞腳

小魔怪執房搵到幾包肉骨茶包，

叫我煲肉骨茶俾佢飲，

今朝一早我就買齊材料~唐排、粉腸和雞腳，

再加個蒜頭一齊煲，

煲佢2個鐘，

好快有得飲架喇!

材料: 唐排$70、粉腸$26、雞腳12隻、蒜頭1個、

馬來西亞肉骨茶包1包、白醋1湯匙

洗粉腸: 鹽2茶匙、生粉2茶匙

洗粉腸方法: 首先用鹽和生粉洗粉腸表面，連續洗粉腸2次，

然後打開粉腸口，灌水入粉腸內，粉腸會由頭
慢慢膨脹到尾，

粉腸尾端會洗出黃色嘅水，重覆做2~3次，壓出粉腸內嘅水後，

燒熱水加粉腸和白醋1湯匙，出水10分鐘撈起粉腸，

剪去粉腸上嘅白色筋膜。

調味: 老抽半湯匙、生抽2湯匙、蠔油1湯匙

做法: 排骨和雞腳洗淨後，放入鍋內加水煮滾，

出水8分鐘後撈起沖洗，雞腳去甲備用；

燒熱10碗水，加入所有材料先煲滾15分鐘，轉小火煲1.5小時後，

落調味後再煲多15分鐘便成。

~煲粉腸最好唔好切開嚟煲，一大揪放入湯內，食時用較剪剪開嚟食。

~揀粉腸方面，肉檔老闆會係切開粉腸中間，睇粉腸內有冇黑色污物，

有嘅話就代表呢條粉腸煮出嚟之後會苦架!

~買粉腸要係早上去買，下午買就可能唔夠新鮮喇!

~食粉腸時，點豉汁加胡椒粉和麻油食就最正啦!

  

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page