煎蠔餅

噚晚整咗我至愛嘅煎蠔餅，

今次我係用半煎炸嘅方法去做，

梗係冇街外食炸得咁香脆啦!

話雖如此，

我整呢個蠔餅個邊邊係脆身的，

內裡帶軟，

加埋蠔仔嘅鮮味，

食到小魔怪和老公lam lam脷呀!

呢個份量，

我總共煎咗3個蠔餅，

每人一份，

唔使爭呀!

材料: 蠔仔1斤、鴨蛋2隻、蔥粒、芫茜適量、蕃薯粉5湯匙、

生粉3湯匙、3~4湯匙水(視乎粉漿杰度)、椒鹽適量

調味: 魚露2茶匙、胡椒粉適量、麻油少許

做法: 將蠔仔倒入一碗內，用清水浸一陣，輕手將蠔仔洗淨後隔去水份；

加入4茶匙生粉洗淨蠔仔表面(要用手指摸吓仲有冇碎蠔殼)，浸洗蠔仔備用；

燒熱水加1湯匙紹酒，將蠔仔汆水15秒，隔去水份後待涼備用；

準備一個大碗，先將蕃薯粉、生粉、調味和3~4湯匙水攪勻，

然後加入蠔仔和蔥粒輕輕攪拌，靜待5分鐘後，再加入已經發勻嘅鴨蛋；

燒熱鑊落多少少油，將蠔仔粉漿分3次落鑊煎，煎至兩邊金黃色上碟，

加上芫茜裝飾便成，可以配埋椒鹽或魚露點嚟食呀!

~洗蠔仔要好輕手，唔好用水大大力沖洗，因為好易洗爆蠔仔肚，

咁D鮮味就會走哂架啦!

~煎蠔餅唔好一次過落哂D粉漿，太厚身個煎蠔飯就唔好食架喇；

~煎蠔餅時，可以用鑊鏟將已定型嘅蠔餅界開幾份，咁就易D將蠔餅反轉身，

中間嘅蠔仔更易熟呀!

~用鴨蛋整呢個蠔餅，係好食過用雞蛋整，個蛋香味會出好多架!

~至於蠔仔使唔使出水呢個問題，大家都可以按自己心意去做，

我覺得出水俾我有少少安全感(驚蠔仔唔熟)。

   
 

  

大家可以入嚟Facebook讚下我新開嘅Fans專頁呀!   雀后(添飯)Facebook Fan Page