日式薯仔大蝦沙律

近排天氣開始熱，

係時候要整D涼拌小食嘆下啦喂!

大小魔怪都鐘意食沙律，

今日就整咗一大盆日式薯仔大蝦沙律喇!

喂喂喂!

日式薯仔大蝦沙律喎，

咁食素嘅大魔怪咪冇得食囉!

嘻嘻，

點會呢，

我一早裝起一大盒俾佢啦!

一個心肝一個命椗，

大家都有得食呀!

材料: 大蝦8隻、薯仔7個(中)、小青瓜2條、罐頭粟米粒1罐、

甘筍半個、雞蛋4隻

調味: 鹽少許、黑胡椒碎、沙律醬適量

做法: 小青瓜切片後加少許鹽撈勻，靜待15分鐘後，用廚紙包好扭乾水份；

將雞蛋、薯仔和甘筍放入鍋內加水煮滾；甘筍煮10分鐘後撈起去皮切粒；

雞蛋烚15分鐘後撈起浸水去殼；罐頭粟米粒放入碟內蒸5分鐘；

薯仔烚30分鐘後撈起去皮(烚嘅時間要視乎薯仔大小而定)；大蝦蒸熟後切粒；

將薯仔、雞蛋略壓碎，襯熱落鹽和黑胡椒碎調味，

加埋粟米粒、青瓜片、甘筍粒和沙律醬撈勻，將蝦粒舖係沙律面，

放入雪櫃雪2小時便成。

~材料方面，可按個人口味加火腿粒、洋蔥絲、煙肉等等都可以呀!

~薯仔唔需要壓成薯蓉，食時有薯仔粒粒，有咬口，口感更佳啊!

~平時整沙律我鐘意少少煉奶，但今日屋企冇煉奶，所以冇落到呀!

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page