雜菌炆伊麵&皮蛋蠔士咸排骨瑤柱粥

今日係佛誕，

午餐就炒咗碟雜菌炆伊麵應下節，

買埋油炸鬼和牛脷酥，

唔少得緊係煲煲靚粥食下啦~皮蛋蠔士咸排骨瑤柱粥，

開飯囉!

蝦醬粉絲蒸豬腩肉

今日去肉檔買豬肉，

問豬肉佬用嚟蒸蝦醬咩肉好食呢???

佢介紹我買肥腩肉，

我話好肥喎~舊豬肉，

豬肉佬話呢舊肥腩肉好好食，

唔好食嘅話就返去算漲喎，

咁就信佢一次咁多啦!

豬肉佬真係冇介紹錯，

D肥腩肉蒸完出嚟咬落去一D都唔肥，

肥肉食落好爽口，

真係唔覺自己食緊肥豬肉呀!

金銀蒜蒸茄子

今日清清哋，

蒸咗呢碟金銀蒜蒸茄子，

可惜忘記了浸粉絲舖底，

不過呢，

一樣咁好食呀!

柱候蘿蔔牛筋腩金錢肚

昨日一早炆咗一大鍋蘿蔔牛筋腩金錢肚，

裝起小部份放入冰箱做儲備；

其餘的就做咗我哋昨晚的晚餐，

仲有小魔怪今日下午嘅午餐呀!

煎蠔餅

噚晚整咗我至愛嘅煎蠔餅，

今次我係用半煎炸嘅方法去做，

梗係冇街外食炸得咁香脆啦!

話雖如此，

我整呢個蠔餅個邊邊係脆身的，

內裡帶軟，

加埋蠔仔嘅鮮味，

食到小魔怪和老公lam lam脷呀!

呢個份量，

我總共煎咗3個蠔餅，

每人一份，

唔使爭呀!

港式揚州炒飯

今日輪到小魔怪home office，

3個人的午餐食咩好???

見有一大碗冷飯係雪櫃，

簡單炒個港式揚州炒飯嚟食先得。

生菜鮑魚

咪睇今日咁富貴食鮑魚呀!

其實呢個係罐頭即食鮑魚嚟架!

之前最平時$100有3罐，

每罐大約有4隻鮑魚仔；

其實依家普遍都加哂價，

而且每個牌子鮑魚仔價錢都唔同，

我覺得鮑魚大細和味道都差不多，

所以會揀平平哋嘅牌子嚟食，

閒時加餸灼埋碟生菜，

開罐鮑魚煮滾D鮑魚汁，

加鮑魚煮多一陣後，

連鮑魚和鮑魚汁淋係菜面，

好方便架!

乾扁福花菜炒牛肉

如果係街外食呢碟乾扁福花菜炒牛肉，

肯定會又咸又辣又多油；

但自己炒囉喎，

梗係少油少鹽和少辣啦!

簡簡單單有菜有肉，

咁又一餐囉!

木瓜眉豆花生雞腳排骨湯

係街市買咗1份木瓜有2個$20，

一個用嚟煲湯飲，

一個就當水果切粒嚟食呀!

薯仔冬菇排骨煲

今日炆咗一大鍋薯仔冬菇排骨，

以我和老公嘅食量應該會食唔哂，

所以分咗一半份量放入餐盒內，

放入冰箱，

咁就隨時蒸熱就食得啦!

日式薯仔大蝦沙律

近排天氣開始熱，

係時候要整D涼拌小食嘆下啦喂!

大小魔怪都鐘意食沙律，

今日就整咗一大盆日式薯仔大蝦沙律喇!

酸菜生魚片

小魔怪至愛食酸菜魚，

問我識唔識整喎???

哈，

呢個世界上有懶人包架嘛，

跟指示做就得啦!

今次買咗條生魚，

請魚檔亞姐幫我起骨，

返嚟慢慢將魚起雙飛就得啦!

脆炸香茅魚露雞翼

响天盛街市買咗10隻大雞翼，

用嚟整呢個脆炸香茅魚露雞翼就最啱喇!

炸到脆卜卜，

好熱氣啊!

唔得，

我要飲番杯冰凍啤酒先得!

柚子豬扒

屋企樽柚子蜜飲咗好耐都仲有半樽，

要諗諗計快D清咗佢先得；

所以呢排得閒就沖嚟飲，

間中仲會用嚟煮豬扒添架!

沙薑手撕雞

响佳寶買咗呢款即食沙薑雞$42隻，

簡單方便而且味道都唔錯，

煲滾水，

剪開最外面包裝袋後，

連內袋放入熱水鑊內浸15分鐘，

取出待涼將雞拆絲，

今次加咗青瓜絲舖底，

灑上炒香芝麻，

食落口感咸咸香香爽爽脆脆架!

XO醬西蘭花炒帶子蝦仁

今日要清樽XO醬，

所以買咗D帶子返嚟炒西蘭花，

見雪櫃有大隻蝦仁，

一於放幾隻落去炒埋一碟啦!

黑椒洋蔥炆排骨

宅在家3個月，

日日有咩做，

買餸煮飯做家居清潔，

上網煲劇睇小說外，

其餘時間都係發"吽"豆囉!

炆咗碟黑椒洋蔥排骨，

加強殺菌和抗感冒啊!

復活節快樂

一個不一樣的復活節假期，

原本大家都計劃出外旅遊，

現在受新型冠狀病毒疫情嚴峻的影響下，

我哋全家唯有留港過節，

除咗南乳炸雞翼和日式大蝦沙律係我整之外，

姐姐就整咗宜家買嘅素丸和豬肉丸，

其餘的食物全都係叫外賣呀!

亂棍打死牛魔王~豆角炒牛肉

哈，

呢餐又係食牛肉呀!

亂棍打死牛魔王，

咪即係豆角炒牛肉囉!

滑蛋炒蝦仁

每當冇咩煮意時，

呢碟滑蛋炒蝦仁，

就會出現架啦!

哈哈，

希望唔會俾人投訴我啦!

素咖哩配薄餅

大魔怪話想食咖哩，

簡單煮咗呢鍋素咖哩俾佢食，

食咖哩點可以唔配薄餅呢!

呢餐唔使食飯都夠哂飽啦!

黑椒牛仔骨

今晚牛魔王又嚟喇!

黑椒牛仔骨，

超級惹味，

送飯一流呀!

酥炸南乳雞翼

酥炸南乳雞翼，

唔好講笑，

真係好鬼脆口，

最鐘意用手一路揸住雞翼食，

一路啤啤佢架喇!

飲勝!!!

金銀蒜粉絲蒸開邊蝦

今朝去街市買餸咗D蝦，

今晚就煮咗呢碟金銀蒜粉絲蒸開邊蝦喇!

雖然係就係麻煩咗少少，

要逐隻蝦剪鬚、開邊和挑腸，

又要炸蒜蓉，

又要浸粉絲；

但見大家食得咁開心，

蒸完出嚟唔使10分鐘就已經俾我3個人KO哂!

做多少少嘢都唔怕啦!

今日煲冬瓜~冬瓜粟米排骨湯

今日煲冬瓜~湯!

冬瓜粟米排骨湯配瑤柱薏米和蜜棗，

呢個湯有袪濕利尿、清熱解毒等功效架!

夏天飲就最啱喇!

超值外賣

老公黃昏去咗公園做運動，

順便行過去天盛富臨買外賣小菜做晚餐，

三餸1粉麵都係$162，

抵過自己煮啦!

今餐我只要灼多碟菜就開得飯喇!

真好，

有機會俾我休息下唔係煮飯~一日咁多啦!

氣炸鍋回歸~氣炸薯角

大小魔怪留家工作，

我真係會忙過平時架，

早餐午餐晚餐緊係唔少得，

仲要煮埋下午茶添架!

今次買袋BB薯仔有8粒$5，

懶得批皮，

所以用嚟焗薯角食就最方便喇!