炸腰果

又係開鑊炸腰果嘅時間啦!

今日開爐有少少阻滯，

就係個煤氣爐開8~10秒後自動熄火，

拿拿臨打電話去煤氣公司搵人整，

約咗明日下午嚟睇下發生咩事，

好彩過年前壞咋，

如果新年壞就大件事，

都唔知點算囉!

材料: 腰果一斤、鹽

做法: 燒熱水加1茶匙鹽，將腰果出水1分鐘後撈起，用廚紙抹乾水份；

倒半鑊油，凍鑊凍油放入腰果後開中火，油滾後轉小火慢慢炸，

其間需要用鑊鏟不停翻轉腰果，直至腰果炸至淺金黃色或至7~8分鐘，

最後轉大火炸多10-15秒，即撈起腰果放在廚紙上煮油，

待涼後加鹽1茶匙撈勻入樽便成。

~千祈要睇火，火力過猛表面會易燶但裡面又唔熟，

所以要用慢火慢慢炸透腰果呀!

~仲有炸腰果唔好炸到太深色先撈起，因為撈起後腰果好熱，

仲會變深色，會過火咗架啦!

~炸腰果方法個個唔同，有人熱鑊熱油炸，有人就凍鑊凍油炸，

個個方法我都試過，個人覺得凍鑊凍油炸腰果易D控制火力，

大家不妨可以試下兩種方法比較下架!

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page