第一次~五香臘味芋頭糕

小魔怪想食我親手整嘅芋頭糕已經等咗好幾年喇!

年年我都話整，

但到最後都係冇整到囉!

今日終於的起心肝，

做出我人生第一個五香臘味芋頭糕，

因為係第一次，

唔知好唔好食，

所以整咗少少出嚟咋，

希望唔會令小魔怪失望啦!

拿，

製成品出咗嚟喇，

睇樣好似好得咁，

食落就唔知味道啱唔啱，

又唔知實定軟，

依家要擺落雪櫃雪一晚，

明天先試食呀!

材料: 芋頭1個約650g(去埋皮啱啱好600g即1斤)、粘米粉130g、

臘腸2條、蝦米2湯匙、瑤柱4粒、冬菇8隻、水1000ml、炒香芝麻(可以唔落)

調味: 五香粉1.5茶匙、鹽1茶匙、糖1茶匙、胡椒粉適量

做法: 芋頭去皮切粒；臘腸沖洗乾淨；冬菇浸軟；蝦米和瑤柱浸20分鐘；

將冬菇用碗裝好(連水)和蝦米瑤柱(已拆絲)用碗裝好(連水)，

放入鑊內蒸10分鐘，倒出冬菇、蝦米瑤柱水留用；

先用250ml水將粘米粉130g撈拌至冇粉粒；

其餘750ml水，裡面已包括浸冬菇、蝦米和瑤柱水，唔夠就落清水；

臘腸亦要蒸10分鐘至軟身後，將臘腸、冬菇切粒；

燒熱鑊落油，加臘腸、冬菇、蝦米和瑤柱絲爆香後盛起；

原鑊再加少少油煎香芋頭粒，落3/4份臘味、調味和450ml水，

煮至芋頭差不多收乾水時，落粘米粉漿攪勻，當粉漿杰身後，

逐少落埋其餘的300ml水，把煮好嘅芋頭糕放入蒸盆內，

把其實剩下嘅臘味舖面，放入蒸焗爐內用100度蒸1小時30分鐘，

又或放入熱水鑊內蒸1小時15分鐘，取出灑上炒香芝麻便成。

~因為芋頭肉內有黏液會令手會痕癢，所以切芋頭時，

手一定要乾爽，唔可以濕水呀!又或帶手套切芋頭都可以呀!

~切芋頭粒時，我會切有大有細的，細細粒嘅芋頭會溶係個芋頭糕裡面，

唔使再另外蒸佢呀!

~我會將炒過嘅臘味放入芋頭糕嘅蒸盆內撈勻，

臘味D油就會黐住係個盆，咁竟唔使再係個盆內搽油啦!

~調味方面，將芋頭粒和臘味炒勻先好落調味，因為臘味有咸味，

落鹽和糖調味時可自行調較呀!

~蒸糕時間嘅長短，視乎蒸嘅大小厚薄而有所調節。

~蒸好嘅芋頭糕，待涼後放雪櫃雪隔夜，咁個芋頭糕就會結實少少，

切起嚟都冇咁易散呀!

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page