南乳芋頭炆腩排

今日菜檔有半個芋頭賣，

已經去咗皮和切好件，

$15半個，

雖然貴咗少少，

但方便我呢D懶師奶呀!

買咗芋頭緊係要買埋排骨啦!

炆排骨一定要買腩排，

肥瘦啱啱好，

炆起嚟腩排又腍又滑，

一D都唔"鞋"口架!

材料: 芋頭半個、腩排$60、南乳(大)半磚、冰糖粒適量、紹酒半湯匙、

老抽少許、薑2片、蔥粒

醃料: 豉油1湯匙、糖1茶匙、生粉1茶匙、麻油少許

做法: 芋頭沖洗後切半；排骨洗淨後落醃料醃1小時；

南乳用半湯匙紹酒搓勻；燒熱鑊落油，煎芋頭兩面至少少焦黃色上碟備用；

燒熱煲仔落油，加薑片和排骨略煎兩面後，落南乳爆炒，

等排骨炒勻至每件排骨沾滿南乳，加2碗半水和冰糖煮滾後，

轉細火慢慢炆25分鐘後，落芋頭炆多10~15分鐘或至芋頭腍，

加少許老抽調色，最後灑上蔥粒便成。

~芋頭蒸到軟軟棉棉，真係超級好送飯架!

~揀芋頭要揀輕身和內裡紫紋多嘅，呢類芋頭會較粉甜呀!

 

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page