荷蘭豆炒臘味

 

母親大人除咗攞咗幾包花雕雞麵外，

仲將幾條臘腸和膶腸俾埋我添!

我見雪櫃有半條臘肉，

一於用嚟炒荷蘭豆啦!

一個人的午餐~台灣花雕雞麵

母親大人前排攞咗4、5包台灣花雕雞麵俾我，

佢話姐姐俾佢的，

因為佢唔鐘意有酒味唔係咁啱佢食，

所以益我俾哂我呀!

哈哈，

母親大人唔啱食但我好啱食囉!

去親台灣我都會買幾包帶返香港架!

呢包花雕麵有雞肉和花雕酒，

雞肉可能柴少少，

但個湯底係杞子雞湯和濃濃嘅花雕酒，

配埋軟軟嘅麵身，

好啱我口味啊!

紫菜雜丸湯河粉

噚日炸雞翼時俾滾油彈親仔手指，

正所謂十指痛歸心，

個水泡正正就係手指甲邊，

掂一掂都好鬼痛架!

老公幫我搽咗燙火膏，

仲貼埋膠布添呀!

今日我全部都有大煮喇!

下午食炒飯，

晚餐就食紫菜雜丸湯河粉，

加埋我至愛嘅炸魚皮、蝦仁菜脯和辣椒油，

正啦喂!

蜜糖芝麻雞翼

今日整咗呢碟蜜糖芝麻雞翼，

好想食脆脆嘅雞翼，

所以選擇用半煎炸方式嚟炸雞翼；

就係咁，

唔小心出咗少少意外，

當我放雞翼落油鑊時，

俾D滾油彈親隻手，

手指起咗個水泡呀!

唔得，

我要食多幾隻雞翼補償番先得。

呢碟雞翼食起嚟甜甜酸酸的，

好送飯架!

冬瓜粟米甘筍生熟薏米雞腳煲西施骨湯

冬瓜粟米甘筍生熟薏米雞腳煲西施骨湯；

有袪濕清熱利尿等功效，

啱哂呢個春夏飲啊!

煲冬瓜湯，

我會煲埋冬瓜皮，

因為冬瓜皮亦都有利尿消腫功效架!

拜山

 

噚日我哋黃氏一家去拜祭父親大人，

之後就去咗妹妹家聚會，

妹妹家工人姐姐整咗好味道朱古力蛋糕做茶點，

我哋緊係要打番幾圈消遣消遣啦!

我打咗四圈贏咗少少買餸錢，

爽啦喂!

晚餐就姐姐請大家食大餐，

叫咗圍酒席請大家食，

不過味道就麻麻啦!

差不多成$3000，

好失望囉!

XO醬西蘭花炒蝦仁

唔知有冇朋友仔好似我咁，

鐘意食西蘭花莖呢???

炒西蘭花時，

我會將西蘭花莖去硬皮，

然後切片同西蘭花一齊炒，

我覺得西蘭花莖同蒿筍一樣咁好食呀!

蝦醬通菜炒鮮魷

蝦醬通菜炒鮮魷，

好耐冇食過囉!

今日見街市有齊材料，

拿拿臨買返屋企啦喂!

螞蟻上樹~冬菇蝦米肉碎炒粉絲

噚日我住果座樓嘅家居網絡又出現問題，

(上個月發生過一次。)

下午4~5點左右開始上唔到網，

我即刻打電話去電訊公司問下，

佢話應該係機樓出現問題，

會盡快派人維修，

可惜到我瞓時(10點左右)都仲未整好呀!

(冇嘢睇就早D瞓囉!)

我冇得上網唔係緊要，

但依家好多朋友在家工作，

學生又要上網課，

所以冇網絡用係好影響架!

前日食剩咗冬菇蝦米豬肉餡，

昨晚就用嚟炒粉絲，

我食粉絲都食飽，

好味道架!

冬瓜粉絲炆釀豆腐卜

突然想起好耐冇整過釀豆腐卜，

所以今日拿拿臨去買材料，

煮呢煲冬瓜粉絲炆釀豆腐卜，

其實唔難架!

只係釀豆腐卜用多少少時間去準備之嘛!

蕃茄薯仔燉牛腩

 

蕃茄薯仔燉牛腩，

呢個餸真係簡單又美味，

蕃茄湯汁可以用嚟撈飯和意粉都得，

真係超級百搭架!

配埋西蘭花做伴碟，

呢碟碟頭飯顏色好吸引呀!

香煎三文魚扒

老公和小魔怪都鐘意食魚，

今餐就買咗件三文魚扒(急凍)返屋企煎嚟食喇!

我只落咗少少鹽和胡椒粉醃一醃，

煎完再落少少蒸魚豉油，

三文魚扒啖啖肉，

食到佢哋LAM LAM脷呀!

木瓜眉豆花生雞腳排骨湯

保護自己，

保護家人，

今日我和老公都已經完成第二針新冠疫苗注射了。

未打疫苗之前我就已經煲好湯，

等打完疫苗返屋企後就有得飲啦!

蝦米粉絲煮娃娃菜

今日晚餐煮咗兩個餸，

蝦米粉絲煮娃娃菜和麵豉蒸排骨，

我鐘意食粉絲代替食飯，

好味又飽肚，

啱哂我呀!

蕃茄肉碎炒雞蛋

今日煮呢個餸又係朱家家常菜之一，

蕃茄肉碎炒雞蛋，

簡簡單單又有營養，

唔好講笑，

呢個煮係會食肥人架，

因為我會為咗撈蕃茄汁，

一定會添多幾次飯架!

節瓜瑤柱炆肉碎

節瓜瑤柱炆肉碎，

係朱家家常菜之一；

呢個餸真係好送飯，

濕濕哋撈飯食最啱呀!

越式扎肉蝦仁蛋炒飯

今日午餐食炒飯~越式扎肉炒飯。

買咗越式扎肉、鳳尾蝦仁，

加埋雞蛋和生菜，

炒埋一大鑊，

應該夠食兩餐呀!

今次買隻貴少少嘅鳳尾蝦炒俾佢老公食，

點知佢話唔習慣D蝦有殼喎!

哈哈，

咁我下次買隻cheap蝦俾佢食先得。

麵包製作精選特別班~第十堂

呢個課程已經係3月尾完成十堂啦!

下一期就要係5月尾先開學呀!

依家休息2個月先，

下期再會!

最後呢堂學整意大利薩莫蓮拿合桃雞湯包、意大利麵條，

和自製羅勒子香草醬。

XO醬小青瓜炒蝦仁

 

今日又係清理雪櫃廚餘嘅時候了；

雪櫃有係小青瓜(上次整日式沙律用剩的)，

加埋XO醬和急凍虎蝦仁落去一齊炒，

成碟餸即時升呢，

可以扮上菜呀!

涼瓜炆排骨

 

今日買咗個苦瓜(雷公鑿)炒俾老公食，

另外又買咗一字排骨加落去一齊煮，

50幾蚊排骨斬開得十二粒左右，

依家D豬肉真係好貴呀!

青紅蘿蔔粟米豬骨湯

 

之前買咗隻即食黑椒咸豬手，

片咗D肉嚟食，

留番起舊骨嚟煲湯，

咪睇舊骨冇咩肉，

但煲出嚟啖湯好濃好惹味，

不過咁，

我都買咗排骨頭放落去一齊煲架!

氣炸蜜汁豬扒

 

為咗清雪櫃裡面嘅叉燒醬和海鮮醬，

今日就買咗4塊梅頭豬扒返屋企，

嚟整蜜汁豬扒喇!

其實同整叉燒做法一樣，

但因為梅頭豬扒較薄身，

所以氣炸時間就冇整叉燒咁耐呀!

分咗2次氣炸豬扒，

第一輪唔使5分鐘就食哂，

再食，

等下轉啦!

豆角炒牛肉

俗語有話亂棍打死牛魔王，

咪即係豆角炒牛肉囉!

買咗牛柳肉嚟炒，

點炒都唔會韌架!

日式薯仔大蝦沙律

香港呢排天氣開始熱，

係時間又要整番D涼拌嘢食食下囉!

見今日仲係公眾假期，

大小魔怪都係屋企，

所以整咗一大盆日式薯仔大蝦沙律；

我預咗一盒冇落大蝦嘅沙律俾大魔怪，

咁就一家大細都有得食啦!

麻辣白切雞

醃咸咗隻雞去拜山，

返到屋企就斬咗半邊雞嚟做餸，

剩番果半邊雞就唔想再食白切雞，

加少少調味就整咗呢碟麻辣白切雞喇!

行清

今日約埋家人返元朗舊屋後山行清。

小魔怪最鐘意返舊屋同小飛飛玩，

不過太耐冇見，

小飛飛唔係咁乖，

唔多理小魔怪啊!

姑奶話冇嘢食引佢，

係唔會叫得郁小飛飛架!

行完清就落咗元朗廣場搵食，

試下呢間開咗冇耐嘅食店~金記冰室。

南乳蓮藕花生炆豬手豬腳

今日復活節假期第一日，

我買咗豬手豬腳嚟炆蓮藕花生配木耳支竹；

肉檔亞姐仲搭咗幾塊豬皮俾我添!

放埋落煲豬手度一齊炆，

老公話豬皮好腍好好食，

佢真係識貨喇!

咸魚雞粒炒飯

今次呢碟咸魚雞粒炒飯，

用料上同平時炒的有少少唔同，

唔同在於我用咗急凍雞胸肉嚟炒喇!

感覺上冇雞髀肉咁肥呀!