南乳蓮藕花生炆豬手豬腳

今日復活節假期第一日，

我買咗豬手豬腳嚟炆蓮藕花生配木耳支竹；

肉檔亞姐仲搭咗幾塊豬皮俾我添!

放埋落煲豬手度一齊炆，

老公話豬皮好腍好好食，

佢真係識貨喇!

材料: 豬手1隻、豬腳1隻、蓮藕1節、花生$5、木耳1朵、乾支竹3條、

薑6片、紹酒適量

醬料: 南乳1磚($6)、1湯匙水(又或半湯匙紹酒)

調味: 老抽1湯匙、冰糖1大粒、鹽適量

做法: 豬手豬腳(連豬皮)放入鍋內加水、薑3片和紹酒大半湯匙，

煮滾出水10分鐘後，倒出豬手沖洗乾淨並隔去水份備用；

蓮藕去皮切件；木耳浸軟切件；花生浸30分鐘；支竹浸軟剪段；

落少許油爆香3薑片和醬料，加豬手豬腳快炒數十下後，

沿鑊邊贊少許紹酒(約1湯匙)，加花生、蓮藕、調味和4碗熱水，

落水最好蓋過豬手面炆45分鐘(中大火滾後轉小火)，

再加入木耳和支竹炆多15分鐘，熄火後唔好開蓋焗下佢，

食飯前再翻熱便成。

~期間如發覺冇水嘅話，可以加入熱水繼續炆架!

~想食腍身豬手，可以再炆多少少時間架!

  

大家可以入嚟Facebook讚下我新開嘅Fans專頁呀!

 雀后(添飯)Facebook Fan Page