蓮藕鱆魚馬蹄甘筍綠豆排骨湯＋陳皮和蜜棗

星期六，

又係煲老火湯嘅時間啦!

未入街市前，

我仲考慮緊煲西洋菜湯定蓮藕湯，

經過菜檔，

俾我係街市見到個大大個又圓碌碌嘅蓮藕，

就係咁，

今日就煲咗蓮藕湯喇!

豉汁鳳爪蒸排骨

今次買嘅係冰鮮腩排，

雖然有少少肥，

但蒸出嚟好滑，

咬落好爽口，

加咗幾粒辣椒仔，

更加惹味啊!

下午茶~咸牛肉芝士飛碟

老爺飛碟機又出動喇!

本來以為裝修時執屋掉咗，

點知又俾我搵番出嚟喎!

記得以前咸牛肉罐頭係要用條鎖匙扭開的，

我次次開到一半就斷咗，

依家轉咗易拉式，

超方便呀!

肥牛一品鍋

小魔怪好想打邊爐，

但係呢個風頭火勢，

肺炎疫情嚴峻嘅時候，

都係少食為佳；

不過咁，

噚晚我就諗咗一個折衷辦法，

就係整呢個肥牛一品鍋喇!

黃薑雞

昨晚整呢碟黃薑雞，

我用咗黃薑粉嚟醃雞，

如果大家可以買新鮮黃薑嚟整都得架!

黃薑，

有抗炎症、抗氧化、預防心臟血管疾病；

降底膽固醇、預防糖尿所引起疾病等等，

想知更多詳情，

click入去睇下~薑黃17種功效及副作用

家常便飯

今日屋企有飯聚，

簡單4餸冇湯，

開飯囉!

黑椒茄子洋蔥豬扒

想煮茄子保持鮮紫色嘅話，

可以先用油鑊炸下D茄子架!

今日煮呢碟黑椒茄子洋蔥豬扒，

超惹味兼好送飯添呀!

頌富~板長壽司

今日下午我同小魔怪去頌富商場攪轉電訊公司手續，

之後小魔怪話想食壽司，

所以就揀咗去板長食嘢呀!

原來小魔怪點咗好多飯，

哈哈，

證明佢真係一個飯桶嚟架!

花膠雲吞雞

花膠雲吞雞，

一鍋裡有齊雞、花膠、菜、餃子和湯，

真係名副其實共冶一爐呀!

韭菜菜脯薄罉

老公口痕話想食薄罉，

買齊哂所有材料先發覺原來屋企冇麵粉，

剩係得番包韓國薄餅粉，

唔理咁多，

整咗先算囉!

由於整埋俾大魔怪食，

所以冇落蝦米呀!

雪菜肉絲越式河粉

近排喜歡煮粉麵做我倆嘅午餐，

意粉、米粉、烏冬、通粉和今日呢款越式河粉；

呢包越式河粉係佳寶買，

簡單將河粉煮滾出水後，

加入自己喜歡的材料，

一碗熱辣辣嘅越式河粉出鍋了!

藥膳雞腳湯

今朝落街好大風，

仲好鬼好凍添呀!

睇真D原來得9度左右咋!

咁凍緊係要煲番個保暖又補身嘅湯水飲下先得!

藥膳雞腳湯，

今次好重手買咗成佰蚊排骨落去一齊煲，

個湯肯定會好正喇!

蒜蓉白菜炒魚片

真係好耐冇買過魚片嚟炒菜，

呢塊魚片係天盛學利魚蛋買嘅，

食落好鮮味，

魚片又彈牙，

正呀!

豐衣<粥>食

星期日，

抗疫期間我哋成家人都冇出街，

4隻腳齊哂啦!

做咩好???

打麻雀???

我想大小魔怪都唔肯啦!

佢有佢哋打機，

我唯有乖乖哋煮下嘢食吧啦!

蠔油薯仔洋蔥炆豬軟骨

由於呢排我係隔幾日先出街買餸，

所以凍肉類食品就比較買多咗少少，

凍肉放入冰箱，

隨時攞出嚟解凍就醃得啦!

今日就整咗呢煲蠔油薯仔洋蔥炆豬軟骨喇!

香煎比目魚

情人節自家煮，

香煎比目魚和白灼西蘭花，

清清哋都唔錯架!

盅頭飯~排骨蒸飯

平時得兩個人食飯，

真係唔想煮大餐囉!

今餐就簡單蒸個排骨飯加碟油菜，

啱啱好，

一粒米都唔嘥呀!

叉燒炒烏冬

自香港有盲搶米和廁紙事件發生後，

屋企附近已經見唔到有米和廁紙賣呀!

冇米，

我哋可以食雜糧，

但冇廁紙就真係好難有代替品喇!

今日搵朋友仔幫我去天貓訂卷裝廁紙、盒裝紙巾、濕紙巾和洗手液等，

希望會好快送到嚟啦!

廿七週年

今日係我和亞朱生結婚廿七週年，

係新冠狀病毒影響下，

我哋都唔諗住出街食飯慶祝囉!

只係中午時份，

兩個人拍拖沿河散步；

晚上就簡單煮餐飯食下算啦!

杜仲巴戟湯

今日又嚟煲老火湯~杜仲巴戟湯，

有保益肝腎、袪風除濕等功效。

由於係藥材湯，

所以味道略有少許苦味；

除湯包料外，

我加咗排骨、杞子、圓肉、大粒紅棗，

煲2小時加鹽就有得飲啦!

2020新春行大運~錦田

今年新春新大運，

我哋一行十一人，

由元朗行去錦田，

全程約兩個鐘頭左右啦!

沿途風景都幾靚架!

未出發前緊係醫肚先啦!

鴛鴦腸豉汁排骨煲仔飯

今晚又係得我倆老食飯，

簡單整個煲仔飯食算喇!

鴛鴦腸豉汁排骨煲仔飯，

好好味道呀!

昨日的午餐

前日買咗隻雞，

醃咸了後放入雪櫃(落兩湯匙鹽和醃兩日)；

將雞蒸熟佢後切咗隻雞髀和雞翼，

蒸一小碗咸魚豬肉碎，

灼埋碟菜芯，

咁就做咗我倆昨日的午餐了。

蕃茄節瓜肉碎雞蛋湯

成個星期冇煲老火湯，

滾個蕃茄湯都頂住先啦!

用屋企剩下的物資湊合而成，

簡簡單單都唔錯架!

芝士汁素牛扒撈出前一丁

大魔怪依家日日係屋企homeoffice，

所以呢排多咗煮素餐!

今次就整咗呢碟芝士汁素牛扒撈出前一丁，

嘩，

唔好講笑，

個芝士汁又真係好鬼正架!

XO醬西芹炒雞柳

1棵西芹可以分兩次食，

兩餐都係炒雞柳，

今次有加XO醬落去一齊炒，

真係惹味好多架!

蘿蔔支竹炆排骨

清下清下，

前兩日買嘅食材又冇咩剩啦!

今日煮埋呢個蘿蔔之後，

睇嚟又要落街入貨喇!

檸檬雞翼

見個雪櫃仲有半個檸檬係度，

用嚟整檸檬雞翼就啱哂喇!

呢個餸酸酸甜甜好鬼惹味架!

多食檸檬可讓大家吸收維他命C，

加強抵抗力添!

節瓜冬菇炆支竹

今日去街市買咗幾款蔬菜，

4個節瓜$28、3個蕃茄$14、1條蘿蔔$11、西芹$15，

以上價錢比平時貴成倍，

朋友話可能仲係新春假期嘅關係喎!

我希望快D回復平時咁就好囉!