蓮子百合紅豆沙!

 

今晚飯後甜品~蓮子百合紅豆沙，

真係起哂沙架，

熱食凍食都得!

煲紅豆沙究竟點樣先可以起沙???

 

 

材料: 紅豆半斤、白蓮子和百合各2兩、冰糖適量、陳皮1塊

做法: 紅豆洗淨浸水後放入雪櫃浸過夜；

蓮子和百合用水浸20分鐘，陳皮浸軟刮囊備用；

將6碗水和陳皮放入Le-creuset煲中煮滾，

加入紅豆和浸紅豆水約2碗(共8碗水)煲1小時15分鐘，

大火煲滾起後轉最細火煲至豆腍；

撈起2/3已煲腍紅豆放入筲箕壓出豆蓉隔去紅豆衣，

間中要淋少少紅豆水沖沖豆蓉落煲內，

加入蓮子和百合煲多45分鐘至1小時至蓮子百合腍後，

加入冰糖調味便成。

~陳皮要凍水落，唔係會有苦味；

~用Le-creuset煲好處係煲滾水後全程可以用最細火，

水份唔會太流失；

~用其他煲都得架，水嘅份量可能要多幾碗水啦!

如煲到乾水時，可加入熱水繼續煲，

紅豆沙稀杰自己調節；

~記得要豆腍先可以加糖，唔係D豆係唔會腍架!

大家可以入嚟Facebook讚下我新開嘅Fans專頁呀!

雀后(添飯)Facebook Fan Page