我姐姐係新加坡出差時，
買咗D肉骨茶包和咖哩魚包俾我，
真係唔該哂呀!
我最鐘意呢個A1牌子嘅咖哩，
真係好鬼正o架!
好香好辣好好味!
咖哩海鮮煲
材料: 蝦8隻、有殼青口10隻、日本帶子2隻、魚柳2塊、薯仔2個、
洋蔥1個、A1咖哩魚醬、快達牌椰汁1罐(小)、蔥花、蒜蓉和乾蔥蓉
醃料:鹽和胡椒粉(醃魚和蝦用)
做法: 蝦剪鬚、腳和挑蝦腸用醃料醃一陣；魚柳解凍後用醃料醃一陣；
日本帶子和青口解凍備用；燒熱水將蝦和青口略略出水，瀝乾水份；
燒熱Le-creuset20cm深底鍋，落少許油爆香蒜蓉、乾蔥蓉和咖哩醬，
加洋蔥和薯仔炒數十下後，落1碗半水煮薯仔和洋蔥15分鐘，
加入椰汁、蝦、青口、魚柳和帶子煲多8分鐘，加上蔥花裝飾便成。
自製薄餅
材料: 麵粉、乾依士、糖、鹽、水和油
做法: 乾依士和糖用和暖水攪勻靜待15分鐘；
將麵粉、鹽、依士粉水混合搓至不黏手，加少許油搓多一陣，
搓成粉糰後用保鮮紙包好，放杯熱水入焗爐，
與粉糰一齊發酵1個半小時；將粉糰分成4份，用手搓成塊狀，
或用木棍輥成圓形，燒熱易潔鑊，不用加油煎薄餅至兩面金黃色便成。
P.S. 大小魔怪變咗啦!
佢哋平時唔多食得辣，
今次一路食，
一路話辣，
仲一路係咁夾餸添，
全因太太太好味道啦!
唔可以唔提今次搓嘅薄餅，
雖然個樣麻麻哋，
不過用嚟點咖哩真係超正o架!
睇嚟我以後可以慳番買薄餅嘅錢啦!
沒有留言 :
張貼留言
如果大家覺得我煮嘅餸菜啱哂口味嘅話，不妨留個言，鼓勵下我啦!