電飯煲煲粥~皮蛋瑤柱咸排骨粥

3年前專登買咗個電飯煲仔俾小魔怪拎去英國用，

當佢讀完書後，

死重爛重咁又拎咗返嚟香港，

佢話用開有感情，

唔捨得留俾人喎!

但拎咗返嚟咁耐，

我都冇咩點用，

今日就用佢嚟煲粥，

估唔到又幾好用喎!

材料: 冷飯2.5碗、咸排骨適量、瑤柱3粒、皮蛋2隻、水5碗

做法: 排骨出水後，落1茶匙鹽醃隔夜；皮蛋去殼切粒；

瑤柱用4湯匙熱水浸軟後拆絲，浸瑤柱水留用；

將5碗水、冷飯、瑤柱絲(連浸瑤柱水1)和咸排骨，

放入電飯煲內襟煮飯制開始煲粥，當粥滾後，記得用木筷子架起煲蓋，

預防粥滾時會有漏出情況呀!當粥滾到綿後(按自己喜好鐘意粥綿嘅情度)，

加入皮蛋滾多2~3分鐘，試味後加鹽調味便成。

~噚日買咗兩條腩肉，我切咗腩肉下面排骨部份出嚟醃咸佢做咸排骨，

如果大家唔想用排骨，可以選豬腱肉嚟醃咸都得架!

大家可以入嚟Facebook讚下我新開嘅Fans專頁呀!

雀后(添飯)Facebook Fan Page