雀后~歡迎!歡迎蒞臨朱家天地!: 香煎素腐皮卷

2019年5月7日星期二

香煎素腐皮卷

好耐冇包素腐皮卷，

噚日包定D素腐皮卷，

今朝煎咗6條俾大小魔怪帶飯，

其餘4條就做咗我哋嘅午餐喇!

材料: 椰菜1/4個、甘筍半條、豆腐乾2個、冬菇10隻、木耳2朵、腐皮2塊

調味: 素食蠔油2湯匙、豉油1湯匙、生粉1.5茶匙、水半碗

做法: 椰菜切絲；甘筍去皮切絲；木耳浸軟切絲；豆腐乾切幼條；

冬菇浸軟切絲；用濕毛巾抹腐皮兩面和修硬邊對摺一開八；

燒熱油鑊先落冬菇和豆腐乾快炒至出香味，

加入甘筍、椰菜和木耳炒勻，落調味煮至收汁後上碟，

待涼後將餡料包入腐皮內，燒熱易潔鑊落少許油，將有摺口先放入鑊煎，

用慢火煎腐皮卷至兩面金黃色便成。

(食時可點喼汁或蠔油埋獻都得o架!)

~2塊腐皮可以包16條腐皮卷，今次包咗10條咋，仲剩腐皮可以包咩呢???

~做腐皮卷最好係即包即煎，因為腐皮包餡後會好易受潮而變軟身；

但我嘅做法係通常會包定放雪櫃，煎腐皮卷前30分鐘從雪櫃取出待室溫，

之後放入油鑊用慢慢火煎。