雀后~歡迎!歡迎蒞臨朱家天地!

唔想再食了無新意的家常菜？唔知外面的餐廳有無用地溝油？覺得下廚好難、好麻煩？定係，根本無時間下廚？無論如何，自己親手烹調的最健康、最美味同安全﹗ 幸福可以好簡單，為自己的家人洗手作羹湯，雖然平凡，卻絕對是人間美味。平凡的食材、用簡單步驟，就能令你同家人一齊感受舌尖上的幸福﹗ 雀后，自問只是一名平凡的家庭主婦，然而她每天都會用心經營，為家人送上最暖的心意，煮出一道道幸福美味。自從大小魔怪出生後，雀后從不假手於人，一家大小的飲食都是她一手包辦，由買餸醃肉到落手落腳煮，都親力親為，務求家人食得健康，食得開心﹗

2018年11月28日星期三

栗子冬菇洋蔥炆雞

不時不食，

呢期栗子靚，

買咗半磅返嚟炆雞；

圓圓黃黃是桂林錐栗子，

香甜又易腍，

用嚟炆雞就最啱喇!

材料: 雞1隻、栗子半磅、冬菇8隻、洋蔥半個、薑3片、

乾蔥頭(切片)、蔥段、紹酒1湯匙

醃料: 豉油1湯匙、鹽半茶匙、糖1茶匙、生粉1茶匙、麻油少許

調味: 蠔油2湯匙、豉油半湯匙、老抽半湯匙、糖1.5茶匙

做法: 用醃料醃雞半天；栗子去衣；冬菇浸軟切條；洋蔥切片備用；

燒熱鑊落少許油，先落雞件煎至兩面有焦黃色後上碟備用；

原鑊不需落油加薑片、乾蔥片和蔥段先炒香，加入冬菇和洋蔥略炒勻，

落埋雞件炒勻後贊酒，快炒數十下後，加栗子、調味和1碗半水煮滾後，

轉小火炆15分鐘便成。