蓮子百合紅豆沙

 

上次係茶樓食咗碗唔多掂嘅紅豆沙，

 

超冇癮呀!

 

都係自己煲好食好多，

 

一路睇波一路食糖水，

 

爽呀!

 

 

材料: 紅豆半斤、白蓮子和乾百合共2兩、冰糖適量、陳皮1塊

做法: 紅豆洗淨浸水2小時(有時間浸過夜仲好)；

蓮子和百合浸洗20分鐘(蓮子去芯)，陳皮浸軟刮囊備用；

將10碗水和陳皮放入Staub煲內煮滾，

加入紅豆煲1小時15分鐘，中大火煲滾起後轉最細火煲至豆腍；

撈起2/3已煲腍紅豆放入筲箕壓出豆蓉隔去紅豆衣，

間中要淋少少紅豆水沖豆蓉落煲內，加入蓮子和百合，

煲多30至45分鐘或蓮子百合腍身後，加入冰糖調味便成。

溫馨提示:

~陳皮要凍水落，唔係會有苦味；

~用Le-creuset或Staub煲嘅好處，係煲滾水後全程可以用最細火，

水份唔會太流失；

~用其他煲都得架，水嘅份量可能要多幾碗水啦!

如煲到乾水時，可加入熱水繼續煲，紅豆沙稀杰自己調節；

~記得要豆腍先可以加糖，唔係D豆係唔會腍架!

大家可以入嚟Facebook讚下我新開嘅Fans專頁呀!

 

雀后(添飯)Facebook Fan Page