唔想再食了無新意的家常菜？唔知外面的餐廳有無用地溝油？ 覺得下廚好難、好麻煩？定係，根本無時間下廚？ 無論如何，自己親手烹調的最健康、最美味同安全﹗ 幸福可以好簡單，為自己的家人洗手作羹湯， 雖然平凡，卻絕對是人間美味。 平凡的食材、用簡單步驟，就能令你同家人一齊感受舌尖上的幸福﹗ 雀后，自問只是一名平凡的家庭主婦，然而她每天都會用心經營，為家人送上最暖的心意，煮出一道道幸福美味。自從大小魔怪出生後，雀后從不假手於人，一家大小的飲食都是她一手包辦，由買餸醃肉到落手落腳煮，都親力親為，務求家人食得健康，食得開心﹗
759亞信屋嘅無激素梅頭豬扒真係好鬼抵，
$100有4包，
每次有優惠我都會買定做存貨，
隨時想加餸都好方便呀!
附上我噚日去天水圍公園影嘅魯冰花。
噚日開始清雪櫃裡面嘅凍肉喇!
俾我摷到有10隻雞翼，
拿拿臨攞出嚟解凍，
用我至愛嘅蝦醬嚟醃雞翼，
一碟蝦醬雞翼出爐啦!
皮脆肉嫩，
我都忍唔住口食咗3隻雞翼，
好滿足啊!
今日買咗魚肉、茄子和豆腐卜，
釀咗一大碟煮煎釀茄子豆腐卜 ，
再加咗個蒜頭豆豉芡汁燴一燴，
正到冇朋友呀!
今餐得3個人食，
簡簡單單，
黃豆醬蒸排骨配豆腐卜和白灼菜芯；
蒸排骨配埋豆腐卜一齊蒸，
豆腐卜索哂D麵豉汁，
送飯一流呀!
前兩日小魔怪話想食雞，
襯佢今日放假係屋企，
我噚日已經買定和醃定隻雞，
今晚放入焗爐度焗，
名正言順鹽焗雞呀!
其實我都幾好鐘意食菠菜，
簡簡單單灼熟佢嚟食又得，
用蒜蓉炒就更惹味，
食得刁鑽D就用金銀蛋肉碎煮嚟食，
菠菜，
真係點煮都咁好食呀!
前幾日大魚大肉，
所以就要食清D喇!
煲咗一鍋潮州粥，
炒咗一大碟三色椒蜆肉炒粒粒，
送粥一流呀!
老公和我足足3年冇返大陸喇!
今日，
我哋搭火車去羅湖，
主要原因係更新銀行資料(更改回鄉證和電話號碼)；
早上係wechat微信~發現~小程式~海關旅客指尖服務，
填寫出入境健康申明卡資料(24小時內有效)，
將個健康申報碼截圖，
過中國海關前掃碼，
再過中國海關，
早上過關唔算好多人，
非常順暢，
冇難度呀!
我哋去羅湖地鐵站內中國銀行，
8點40分到達，
9點30分先開門，
已經有10個人排隊等候，
之後人數會越來越多，
要處理銀行業務嘅朋友就要注意啦!
噚晚打邊爐，
食剩咗一條樹記鮮腐竹，
今晚就用佢嚟整咗碟鮮腐竹蒸甜梅菜，
簡單又好味道，
送飯一流架!
噚日同祈祈慶祝完生日，
已經食咗餐勁架啦!
今日又輪到我哋屋企食酸菜魚火鍋，
今次好彩我預備咗唔係好多食材，
加埋大魔怪女朋友仔，
我哋5個人食，
大魔怪女朋友仔買咗大埔樹記嚮鈴、豆卜、鮮腐竹，
魚片和振興牛丸；
買咗包醃好嘅魚片肉，
又唔錯喎!
先灼魚肉食，
然後就用個酸菜湯底打邊爐，
好正呀!
