沙葛豆豉炆雞翼

老公和我都好鐘意食沙葛，

鐘意佢夠爽脆，

鐘意佢清甜呀!

噚晚就用咗沙葛嚟煮餸，

整咗個沙葛豆豉炆雞翼，

加咗D辣豆瓣醬落去，

辣辣哋，

好惹味架!

材料: 雞翼10隻、沙葛半個、蒜蓉、豆豉粒、紹酒少許、粟粉水、蔥絲

醃料: 豉油1湯匙、糖1茶匙、粟粉1茶匙、麻油少許

調味: 蠔油1湯匙、豉油半湯匙、糖1茶匙、辣豆瓣醬1茶匙、水大半碗

做法: 雞翼斬件後用醃料醃1小時；沙葛去皮切片；

燒熱油鑊落雞翼煎煎兩面後，後加入蒜蓉豆豉和贊少許紹酒，

爆炒十幾下後，加調味煮雞翼15分鐘；落沙葛煮多3分鐘，

加少許粟粉水煮至汁杰便成。

~用未解凍嘅雞翼先斬件，切出嚟嘅雞翼冇咁多碎骨架!

　  

 

 

 

大家可以入嚟Facebook讚下我新開嘅Fans專頁呀!

 

雀后(添飯)Facebook Fan Page