雖然今日唔係我生日，
9月先係呀!
不過襯係星期六，
所以母親大人和妹妹一家都入咗嚟天水圍，
姐姐和姨甥同時中咗招仲未好番，
所以佢哋一家都嚟唔到呀!
大小魔怪兩個好乖仔，
唔想我煮飯，
叫咗派對套餐，
$1500以上免費送貨，
食品種類好多，
味道都唔錯架!
我仲整咗南乳雞翼和煲咗個雪梨湯添呀!
今日大魔怪女朋友仔嚟食飯，
簡單煮咗佢鐘意食嘅蝦醬蒸豬肉，
清蒸老虎斑和絲瓜咸蛋肉片湯。
小魔怪已經好番7~8成，
口腔裡傷口已經冇咁痛，
食嘢可以食固體啦!
今日午餐係佢指示想食嘅，
蝦仁炒蛋和西蘭花炒越南牛肉扎肉。
8月26日(星期一)
今日我哋約咗姑奶和朋友，
一行4人返大亞灣住幾日，
我哋先係蓮塘口岸食飯，
再call滴滴去大亞灣屋企。
今日見商場有木瓜賣，
$20有3個，
抵食喎，
用咗1個木瓜煲湯，
木瓜雞腳眉豆花生煲西施骨，
其餘兩個就當水果食呀!
今晚小魔怪話想食粥，
响keeta搵到呢間大師傅粥品，
叫咗個狀元及第粥餐$68，
配埋豉油皇炒麵和油炸鬼，
窩蛋碎肉粥$37和韭黃鮮蝦腸粉$28，
加多$2平台費，
總共$135。
呢排小魔怪冇啖好食，
佢話唔想再食粥，
問佢想食得咩???
佢話食薯蓉啦!
於是拿拿臨買2個薯仔和鮮奶，
整咗呢個經典薯蓉，
佢慢慢食，
食得好滋味呀!
今日又係家常便飯系列，
香煎銀雪魚、麵豉蒸排骨和菜芯炒肉卷，
3個餸冇湯飲，
唔講咁多，
開飯喇!
雪櫃有碗豬肉碎，
簡單浸少少蝦米和粉絲，
炒咗一大碟肉碎蝦米炒粉絲(螞蟻上樹)，
粉絲當飯食，
好正架!
小魔怪近日做手術，
暫時食唔到固體食物，
所以我煲咗鹿茸菇煲雞俾佢補補身呀!
噚日煲咗霸王花粟米紅蘿蔔煲西施骨，
呢個湯有清熱、润肺、止咳除痰外，
仲有舒緩便秘、排毒等功效；
霸王花雖然食落有滑潺潺嘅口感，
但佢可以潤腸通便，
嘻嘻，
啱哂我呀!
老公和亞仔佢嚟3個都鐘意食燒肉，
所以買咗1斤燒肉返嚟，
半斤即日食咗，
剩番半斤就買咗D豆腐卜炆嚟食呀!
今日約咗母親大人去妹妹妹夫家打麻雀，
我和老公買定盒雙餸返上去做午餐，
之後就開始竹戰喇!
妹妹妹夫準備咗日式小食和白酒做下午茶，
晚上就辛苦妹夫去買咗幾盒小菜，
妹妹家新工人姐姐整嘅豉油雞好有水準，
母親大人就炆咗節瓜花膠冬菇，
我和老公咩都冇整，
齋等食呀!
返大陸前買咗半斤枸杞，
滾咗鍋枸杞豬潤瘦肉湯，
一次飲唔哂，
第二日用嚟煮河粉食，
好正呀!
8月12日星期一
我和老公返咗惠州，
可能黃雨關係啦!
果日冇咩人搭小巴去蓮塘過關，
過兩個關口都好順暢，
簡直直行直過呀!
我哋一出大陸關口就搭永東大巴返惠州。
今日我哋去屯門青松觀盂蘭節附薦嘅日子，
雖然天氣又曬又熱，
好彩仲有風，
所以咁多人聚集都冇咁辛苦呀!
之後去咗良景村飲茶當午餐，
10個點心加一碟炒粉麵，
6個人食咗$540呀!
雪櫃有包魷魚乾，
即刻買D梅頭豬肉返嚟，
蒸咗呢碟魷魚蒸豬肉，
老公話呢碟豬肉好送飯，
唔錯呀!
大魔怪和女朋友仔去越南玩咗6日，
佢哋話果度食嘢好平，
食成枱嘢都係百零蚊，
真係好抵呀!
佢買咗一大堆越南手信返嚟，
仲有2件越南扎肉，
今日我就用佢嚟炒咗鍋越南扎肉炒河粉呀!
今日又係得我和老公兩個人食晚餐，
我用養生壺煲咗個五指毛桃鹿茸菇蓮子白合淮山湯，
配上西施骨、龍眼肉、蜜棗和瑤柱仔，
啖湯好濃郁，
超正呀!
街市有芥菜苗賣，
我買咗$10嚟食呀!
雖然芥菜有少少苦澀味，
唔知係咪人老咗，
我竟然越來越鐘意食添!
今日用佢嚟整咗呢個芥菜蝦乾瑤柱粒排骨煲，
有湯有肉有海鮮又有菜，
啱哂我和老公兩個人食呀!
今日同母親大人食完午餐後，
就陪佢搭車返沙田啦!
佢已經行路自如，
沒有問題了。
午餐係天耀佳記餐廳食飯，
叫咗1個常餐和2個午餐，
呢餐食咗$180呀!
飯太多，
先裝起今晚又唔使煮飯喇!
今日母親大人隻腳已經好番好多啦!
依家仲可以自己一個人落街慢慢行，
佢成日想話返自己屋企住，
睇下明天情況再決定啦!
今餐整咗佢鐘意食嘅炸蠔餅，
食到佢Lam Lam脷呀!
(條邊脆卜卜好味道呀!)
今日係母親大人入嚟天水圍住的第一日，
早上7點15分左右，
我就同佢落街行公園，
經過噚日食藥和搽藥膏，
而且又有拐杖協助行路，
佢慢慢行已經冇難度呀!
噚晚母親大人自己一個人，
去沙田大會堂睇大戲，
點知中途去廁所，
唔小心PK跪咗落地下，
好彩隻手扶住樓梯扶手，
唔係肯定碌落樓梯；
事後佢仲可以自己返屋企，
點知今朝起身隻腳就腫痛起來，
行路都有困難呀!
姐姐姐夫即刻車去仁安睇急症，
照埋X~ray好彩冇傷到骨，
只係撞傷咗肌肉；
佢自己一個人住大家都唔放心，
咁啱大魔怪去咗旅行，
於是姐姐姐夫車母親大人入嚟天水圍，
等我可以呢幾日照顧佢日常飲食呀!
今晚煮咗豉油雞腳雞翼，
等佢補補腳骨力呀!
平時當我唔想食飯，
又或想偷懶唔想煮咁多餸嘅話，
我就會煮粉麵嚟食架啦!
今日滾咗呢個三文魚頭豆腐肉片湯，
大小魔怪和老公都話點解D湯得咁少，
每人都係飲咗1碗多少少，
唔夠喉呀!
我都唔知原來佢哋咁鐘意飲呢個湯，
咁我下次再滾嚟飲啦!
平時我會落埋蕃茄薯仔一齊滾，
今次我唔記得買，
所以冇落到呀!
