日式麵包制作精選實習中班~第一堂

 

相隔兩星期後，

星期二又開始晚上上堂學搓麵包喇!

今堂係第一堂，

學整香草蒜蓉芝士蕃茄包&香芋煙肉包。

蒜香豬扒

我同老公兩個人食飯好簡單，

一碟菜一碟肉就夠，

今餐煮咗碟蒜香豬扒，

老公和我竟然食唔哂，

哈哈，

其實我哋食力麻麻哋架咋，

但唔知點解都係咁肥囉!

蔥花雞蛋煎餃

平時我哋晚飯時間通常都係6點半左右，

老公和我都已經習慣咗早食飯；

但小魔怪就唔多習慣喇!

佢平日返工好少會咁早食晚飯，

所以每當佢WFH果日，

晚餐會食得好少，

但到差不多9點零10點，

佢就開始肚餓喇!

好彩冰箱總有幾包急凍煎餃係度，

拿拿拆開包餃子煎熟佢，

咁就可以塞住佢個胃啦!

鹵醬骨架、鵝掌和雞蛋

之前天水圍大停電，

雖然我哋屋苑話就話停咗3小時，

但老公話都係清一清冰箱裡食材穩陣D呀!

黃埔逸逸居

噚晚，

我哋到紅磡世界殯儀館送別光姨丈，

願姨丈一路走好!

妹妹和妹夫趕返去屋企陪祈祈溫書，

母親大人、姐姐、老公和我，

就行去黃埔搵食；

本來想去詠藜園食四川菜，

但等位人太多，

我哋改去逸逸居食粵菜呀!

4個人叫咗份片皮鴨套餐，

送糖水，

承惠$801。

肉骨茶

 

老公話想飲肉骨茶，

又襯小魔怪噚日係屋企，

即刻買材料嚟煲啦喂!

蔥油手撕雞

今日小魔怪又WFH，

已經準備咗嘅雞胸又要留番今日做餸呀!

雞胸肉比較"鞋"，

所以加咗隻大雞髀落去整手撕雞，

咁撈埋一齊食就唔覺"鞋"啦!

咖哩豬皮蘿蔔魚蛋牛柏葉

呢餐餸係大停電果日整架!

啱啱放低飯碗冇耐就停電喇!

屋企樽大孖秘撈魚蛋醬就嚟到期，

拿拿臨睇下買咩食材嚟用咗佢先得；

魚蛋醬就緊係要整魚蛋啦!

今日整咗咖哩豬皮蘿蔔魚蛋牛柏葉，

影低相send俾姐姐妹妹睇，

哈哈，

佢哋話好想食喎，

OK啦!

下次聚會就整俾大家食啦!

元朗天水圍大停電

噚晚七點左右，

屋企突然漆黑一片，

再望出窗外，

發現成個天水圍區都冇電呀!

除咗冇電外，

電話和電腦網絡都用唔到，

所以我哋都唔知發生咩事呀!

好彩將手機放近窗邊，

竟然有國際漫遊服務，

咁我先可以接收世界資訊呀!

有網絡即刻收到信息，

原來元朗有條電纜橋火燭和塌橋，

即刻摷出停電三寶，

蠟燭、大葵扇和電筒；

慶幸我哋屋苑由7點停電到大約十點左右就有番電和水，

但我朋友就冇咁好彩，

佢哋屋苑到今朝都仲未有電和水呀!

希望電力公司能夠盡快搶修好啦!

氣炸蜜汁叉燒

呢排我哋果邊商場開咗好多間豬肉檔，

互相競爭下，

我哋消費者就有福了，

豬肉又平又靚，

今日就買咗1斤半梅頭肉，

用嚟整蜜汁叉燒呀!

梅頭肉又腍又滑，

有少少肥，

焗出嚟嘅叉燒特別好食架!

今次焗咗半份(2條)叉燒，

仲有半份(2條)明天再焗呀!

父親節午餐

父親節午餐，

唔想出街出人迫，

叫外賣就最啱喇!

大小魔怪請食飯，

開心!!!

今朝去7~11買8支Dreyer's甜筒$108，

做父親節甜品呀!

豉汁鳳爪排骨

好耐冇食鳳爪喇!

拿拿臨今日即刻買磅鳳爪返嚟，

蒸咗豉汁鳳爪排骨過過口癮呀!

青紅蘿蔔粟米螺片排骨湯

今日去街市買粟米煲湯，

$12有3條，

好抵喎!

拿拿臨買埋其他材料就返屋企煲湯，

一來天氣熱，

旱D煲湯咁下午個廚房就冇咁熱，

二來小魔怪返下午班，

佢臨返工前可以飲碗湯潤一潤呀!

咸魚雞粒燴豆腐

今日買咗塊薄薄梅香咸魚，

煮咗呢碟咸魚雞粒燴豆腐，

又係一個添飯嘅餸嚟架!

不過我唔敢食太多飯，

食半碗飯過過口癮就夠，

食多幾條菜補數呀!

咸魚可以分4餐嚟食，

例如煮魚香茄子、咸魚雞粒炒飯、燴豆腐等等。

日式麵包製作實習初班~第九、十堂

呢期麵包班，

由1月初開學，

但因第五波疫情嚴峻嘅關係，

我哋返學都係斷斷續續，

終於係上星期二學完呢十堂喇!

第九堂~日式起酥麵包&奶油千層包

冰花酸梅豬手

噚日去天盛街市買咗隻冰鮮豬手，

特價$40隻，

超抵呀!

買咗樽冰花酸梅醬嚟炆豬手，

酸酸甜甜，

好開胃呀!

沙田新強記燒鵝酒家

噚晚，

我同老公去寶福紀念館送別親友，

之後約埋大伯和大伯娘一齊去食晚飯，

近近哋選擇去沙田新強記燒鵝酒家。

叫咗份海鮮孖寶和燒鵝半隻，

加兩碗白飯，

盛惠$730。

Encore~麻辣手撕雞

 

話說噚日整咗盒雞胸肉俾小魔怪帶返公司做午餐，

點知佢臨時決定WFH呀!

於是我拿拿臨攞隻雞髀出嚟解凍兼醃咗佢，

晚上再做一碟麻辣手撕雞；

今次份量超級足夠，

啖啖肉，

食得好爽呀!

菜乾螺片紅蘿蔔粟米排骨湯

上星期買咗兩扎菜乾，

攞咗幾條菜乾嚟煲粥；

今日就攞其中一扎嚟煲菜乾湯呀!

得兩個人飲，

所以用個細煲煲就啱啱好喇!

惹味蒜香骨

之前買咗幾件豬仔骨，

今朝攞出嚟解凍後醃佢大半日，

落油鑊炸到脆卜卜，

雖然好鬼熱氣，

但勝在好惹味，

正呀喂!

豉汁涼瓜炆排骨

 

今日炆咗碟豉汁涼瓜炆排骨，

買咗雷公鑿又名大釘嘅涼瓜，

有人話同呢個品種嘅涼瓜炒出嚟冇咁苦喎!

不過老公話所有涼瓜佢都鐘意食呀!

扮靚

我嘅白頭髮長得太快，

今日終於忍唔住走咗去做顏色焗油，

做顏色焗油比較唔傷頭髮呀!

今次焗嘅顏色正正常常，

直髮又得，

卷圈圈又得，

得咗!

豉油皇煎蝦

買咗1磅幾蝦，

整咗小魔怪至愛嘅豉油皇煎蝦，

老公和我食咗兩三隻，

其餘嘅蝦俾小魔怪全部KO哂呀!

冬瓜粟米魚尾湯

今日滾咗呢個冬瓜粟米魚尾湯，

有我鐘意嘅冬瓜和粟米，

啖湯又奶白又鮮甜，

而老公和小魔怪就將成條魚尾食清哂，

一D都唔嘥呀!

南乳炆齋

南乳炆齋，

大魔怪至愛，

添咗兩碗飯，

食飽飽囉!

麻辣手撕雞髀

今日端午節，

午餐煲粥食糭，

晚餐就整咗呢碟麻辣手撕雞髀，

朋友仔介紹我買嘅麻辣油，

少少麻少少辣，

唔錯架!

屯門美心皇宮

噚日好有食神，

中午我同母親大人飲茶，

晚上又有大伯大伯娘請食飯；

揀咗屯門美心皇宮，

我哋總共5個人，

叫咗個鮑魚龍蝦4人餐，

再加多碟椒鹽排骨，

連加一食咗$1795.2。

沙田潮庭

今日專登出沙田，

約母親大人去潮庭飲茶，

順便攞埋我整嘅糭俾姐姐妹妹佢哋呀!

母親大人話未食過我整嘅麵包，

拿拿臨攞咗2個噚晚學整嘅麵包請佢食呀!