依家香港地新鮮豬肉賣得咁貴，
今日第一次試下係凍肉舖買磅急凍排骨粒($20)，
整咗呢碟菠蘿甜酸排骨，
老公和小魔怪食過話好似同新鮮冇咩分別，
但我食落急凍排骨肉質比新鮮排骨係腍身少少架!
材料: 急凍排骨粒1磅、罐頭菠蘿4片、雞蛋1隻、蒜蓉、
麵粉5湯匙、甜酸醬適量
醃料: 豉油1湯匙、鹽半茶匙、糖1茶匙、紹酒少許、生粉1茶匙、麻油少許
做法: 急凍排骨鮮凍後用廚紙索乾水份，落醃料醃2小時；雞蛋發勻備用；
從雪櫃取出排骨，待室溫45分鐘後加入蛋液撈勻；
將排骨放入膠袋內，落麵粉5湯匙後搖勻，讓每粒排骨沾上麵粉；
將排骨粒放入氣炸鍋內，噴少少油係排骨面，用180度炸8分鐘，
反轉排骨再噴少少油炸多8分鐘；將菠蘿片切粒舖碟，放上炸好排骨，
食時點泰式甜酸醬，夠哂惹味呀!
真係好方便咁。
回覆刪除依家有咗部空氣炸鍋，用起嚟俾焗爐更方便呀!
刪除排骨點去左陣雪味？ 我買過急凍雞比整滷水，又汞水，又浸鹽水都去唔到陣味。
回覆刪除我會先將D排骨浸水1小時，然後揸乾水份再用廚紙索水時大力少少，將血水揸哂出嚟，
刪除醃肉時加紹酒一齊醃呀!至於醃冰鮮或雪雞，用蒜、薑、乾蔥和紹酒都可以去雪味架!
不過我就成日食冰鮮雞，好少食急凍雞(雪到死實實咁)，肉質好梅架!
thank you (心心）
刪除上次我應承幫人整雞比。沙田街市幾檔都無雞比。唯有去百佳買冰雞比囉。
依家百佳都有凍鮮雞髀賣，下次可以買嚟試下呀!
刪除