日式薯仔火腿粒沙律配香草蒜香烤雞扒

呢排日日都成35~36度，

真係想熱C我咩!

襯今日得我一個人食午餐，

拿拿臨整盆日式薯仔火腿粒沙律，

配埋塊香草蒜香烤雞扒，

咁就做咗我今日嘅午餐喇!

日式薯仔火腿粒沙律

材料:火腿扒1塊、小型薯仔8個、小青瓜2條、罐頭粟米粒1罐、

甘筍半個、雞蛋3隻

調味: 鹽少許、沙律醬適量、煉奶1湯匙

做法: 小青瓜切片後加少許鹽撈勻，靜待15分鐘後，用廚紙包好扭乾水份；

將雞蛋、薯仔和甘筍放入鍋內加水煮滾；甘筍煮8分鐘後撈起切粒；

雞蛋烚15分鐘後撈起浸水去殼；薯仔烚30分鐘後撈起去皮；

罐頭粟米粒放入碗內蒸5分鐘；火腿扒灼熟後切粒；

將薯仔、雞蛋略壓碎，襯熱落鹽調味，

加埋粟米粒、青瓜片、甘筍粒、火腿粒和沙律醬和煉奶撈勻，

放入雪櫃雪1~2小時便成。

~材料方面，可按個人口味加洋蔥、煙肉等等都可以呀!

~薯仔唔需要壓成薯蓉，食時有薯仔粒粒，有咬口，口感更佳啊!

~整沙律我都幾鐘意放煉奶，酸酸甜甜，好鬼開胃架!

香草蒜香雞扒

材料: 雞扒1塊

醃料: 鹽3/4茶匙、雜香草適量、蒜粉適量、黑胡椒碎適量

做法: 雞扒解凍後用廚紙索乾水份，落醃料醃半日或以上(醃隔夜就仲入味)；

先將雞扒(雞皮向底)放入氣炸鍋用200度焗10分鐘，

取出反轉焗有雞皮果面200度10分鐘便成。

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page