2019台灣之旅

今日老公、我和佢嘅同學，

一行14人齊齊飛台灣玩4日，

仲租咗車2日，

車我哋周圍去玩添架!

台北依家天氣同香港差不多，

所以執行李非常簡單，

買埋張上網咭，

咁就隨時可以上facebook啦!

 
 

  

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page

泰式炸雞膇

好鐘意用呢包泰式炸雞醃料嚟整炸雞，

原因係佢快靚正，

咩調味都唔使落都已經好夠味!

但我想佢再辣D，

所以炸完再灑七味粉上去，

咁個辣味就更香喇!

魚肉蛋角紹菜煲

今日買咗半斤魚肉嚟整蛋角，

行過菜檔見有紹菜仔賣，

又唔係貴$18有2斤，

所以買咗少少煮呢個蛋角喇!

土魷馬蹄蒸肉餅

好鐘意食馬蹄蒸豬肉，

今次加埋隻土魷落去一齊蒸，

超級惹味呀!

但依家買2隻土魷都唔平，

20蚊先得果2隻，

真係唔平架!

素湯~蓮藕馬蹄甘筍粟米栗子湯

噚日煲咗個素湯俾屋企人飲，

蓮藕馬蹄甘筍粟米栗子湯，

加埋眉豆花生、蜜棗和陳皮落去一齊煲，

一個字~正!

新玩具

近排大魔怪迷上攝影，

佢買咗部新相機返嚟後，

咁呢部之前用緊嘅Sony6500俾咗我和老公，

話等我哋遲下去玩時可以影多D相喎!

呢部相機功能仲未學識點用，

所以剩係學下用最最最簡單模式影下花影下人算喇!

豉油雞髀

今日係佳寶買咗3隻大雞髀都係$20，

午餐得我和老公倆個撐枱腳，

所以煮咗2隻豉油雞髀做午餐就最啱喇!

香煎蓮藕素餅

記得年初一時，

整咗呢碟蓮藕素餅，

大魔怪食得不知幾滋味呀!

材料非常簡單，

煎出嚟真係冇難度呀架!

花膠香菇炆雞翼

小魔怪依家日日帶飯，

諗下有咩啱飯盒餸先得；

今日就炆定煲花膠香菇炆雞翼，

聽朝早再烚少少菜俾佢帶飯，

咁就又攪掂一餐啦!

花膠用上平價嘅鱈魚膠，

平平哋用嚟炆煮煲湯都唔錯架!

海味粉絲雜菜煲

摷到雪櫃有2隻魷魚乾仔，

用嚟剁豬肉又好似唔夠，

但用嚟煮呢個海味粉絲雜菜煲，

就啱啱好喇!

2019新春盆菜宴

今日元朗舊居圍村攪新春盆菜宴，

今次訂呢間盆菜份量超多，

我哋8個大人已經好努力咁食，

都係食咗半盆咋!

食得唔好嘥，

其實的我哋攞咗返屋企，

明天做餸呀!

不一樣的紫菜肉片蛋花湯

不一樣的紫菜肉片蛋花湯，

只是加咗十零廿粒瑤柱仔，

啖湯即刻鮮味好多，

真係可以連鹽都唔使落架!

台式滷肉飯

我好鐘意上youtube睇人煮餸架!

最鐘意睇詹姆士，

佢教人煮嘅餸，

講解易明又易做，

今日學整呢個台式滷肉飯，

過程大致差不多，

但調味份量就跟咗自己個人口味喇!

加埋炸豆腐和雞蛋一齊滷，

肯定入哂味呀!

南乳蓮藕芹菜芽菇炆腩肉

客家人過年一定會有碟炆芽菇，

但今年過年時冇炆芽菇俾老公食，

今日見街市仲有芽菇賣，

即刻買D返嚟煮碟客家餸啦!

柱候蘿蔔金錢肚牛筋腩

就係為咗呢幾件鄉下帶返嚟自家種嘅蘿蔔，

今日買咗成百蚊材料返嚟，

煮咗呢煲柱候蘿蔔金錢肚牛筋腩呀!

猴頭菇蟲草花花膠螺片豬腱湯

今日又有靚湯飲啦!

猴頭菇蟲草花花膠螺片豬腱湯，

配埋紅棗、淮山、圓肉和杞子，

啖湯好鮮甜，

正呀!

26週年

唔經唔覺，

今日係我和老公結婚26週年，

連同姑奶和小魔怪，

晚餐選擇出外食呀!

祈祈8歲生日

祈祈原本係呢個月18號生日，

襯今日去妹妹家拜年，

一於齊齊慶祝埋祈祈8歲生日呀!

我整咗拿手嘅咖哩豬皮蘿蔔魚蛋，

其實食物叫外賣呀!

新春回鄉過年

近呢廿年每年年初三，

大伯大伯娘、姑奶、老公和我，

都會返惠州過年，

我哋好鐘意回鄉過年嘅氣氛，

一大班親戚朋友圍埋一齊食下家鄉美食，

又想下當年，

好溫馨架!

好開心返到屋企，

堂弟婦已經幫我哋打掃好間屋，

又攞咗好多水果俾我哋食呀!

大年初三

噚日中午去咗姨媽度拜年後，

母親大人和我哋姐妹幾家人一齊上咗姐姐屋企拜年呀!

晚餐由姐姐和姐夫煮理，

9餸1湯，

好豐富呀!

大年初二

今日係大年初二，

簡單食過開年飯後，

又要出外拜年喇!

大年初一

今日大年初一，

我祝大家身體健康，

龍馬精神，

心想事成，

萬事如意!

朱家傳統以來初一係食全日齋，

嘻嘻，

啱哂大魔怪口味呀!

簡單4餸1湯，

食飽飽後就要去大伯家拜年喇!

新年快樂~香煎蘿蔔糕

今日係年三十晚大除夕，

晚餐真係好簡單，

食番噚晚團年嘅舊餸外，

仲煎咗幾件蘿蔔糕食添呀!

2019朱家團年飯

今年呢餐團年飯好齊人，

母親大人、姐姐一家和姐姐一家加埋我哋一共11人，

齊齊聚埋我屋企團年呀!

9餸1湯，

白飯任裝，

開飯啦!

2019朱家蘿蔔糕

一年一度朱家蘿蔔糕又出爐啦!

今年又係同往年一樣，

買咗6斤蘿蔔

去頭去皮後啱啱好5斤半左右，

整咗3個唔同大小嘅蘿蔔糕呀!

柱候蘿蔔支竹炆排骨

今日買咗幾條蘿蔔嚟整蘿蔔糕，

見買多咗少少，

所以攞咗嚟炆咗個排骨煲食喇!