冬至快樂~熱辣辣羊腩煲

小魔怪由英國返咗嚟香港咁耐，

佢話冇食過羊腩煲喎!

襯今日係冬至，

一於嚟過熱辣辣暖笠笠嘅羊腩煲啦!

咁大魔怪呢???

佢12月中開始放大假，

前幾日飛咗去日本玩，

28號先返香港呀!

材料: 羊腩3磅、馬蹄24粒、竹蔗1扎、炸乾支竹1包、薑6片(拍扁)、

紹酒2湯匙、冰糖1粒(乒乓球咁大)、老抽少許(調色用)

調味: 大南乳一磚、腐乳4件、柱候醬1湯匙

腐乳醬: 腐乳5件、糖1茶匙、水大半湯匙、麻油少許

做法: 羊腩用3片薑和1湯匙紹酒出水，洗淨後備用；

馬蹄去皮；乾支竹浸軟切段備用；竹蔗破開；

落油爆3片薑和調味，落羊腩炒勻後贊1湯匙紹酒炒數十下，

落馬蹄、竹蔗和5碗水，水要蓋過羊腩面，水滾後轉最小火炆1小時，

落支竹和加少許老抽(1茶匙)，炆多15分鐘後熄火，

唔好開蓋繼續焗羊腩2~3個鐘；飯前攞走竹蔗，

將羊腩轉入電鍋煮至翻滾，加埋生菜和響鈴一齊烚下烚下便成。

~落老抽係調色用途，唔落都可以架!

~滾到咁上下冇汁嘅話，可以加少許熱水落架!

    

  

大家可以入嚟Facebook讚下我新開嘅Fans專頁呀!  

雀后(添飯)Facebook Fan Page