昨日我和老公又去探姨甥女~允祈。
唔見一個星期，
佢又抵打咗啦!
BB都算俾面我哋D姨媽，
我哋咁嘈咁打麻雀和唱K，
佢都瞓得好舒服，
一D都冇扭計，
剩係到咗夜晚先開始眼仔睩睩望住我哋班大人!
母親大人話BB近排半夜1點幾食完奶後，
可以捱到早上6點幾先再食奶，
抵抵抵錫呀!
我昨日整咗一大盒咖哩豬皮魚蛋魷魚什丸，
仲以為有剩可以留番俾大小魔怪食，
點知妹夫話不如留番俾佢第日煮麵做早餐喎!
佢哋話最好味係D豬皮，
因為索哂D咖哩汁呀!
材料: 魷魚一盒、豬皮、魚蛋、墨魚丸、貢丸、八爪魚丸、蒜蓉和乾蔥蓉
醃料: 咖哩粉1茶匙、豉油1湯匙、老抽少許、糖1茶匙、粟粉2茶匙、
麻油和紹酒
調味: 蠔油2湯匙、海鮮醬1湯匙、咖哩粉1茶匙、豉油半湯匙、
雞粉1.5茶匙、糖1茶匙和水3碗
做法: 魷魚解凍去衣洗淨抹乾水份，用醃料醃1小時；
豬皮浸軟後小心清去沙粒，用薑蔥出水10分鐘熄火焗15分鐘瀝乾水份；
什丸和魚蛋出水備用；燒熱鑊落油爆香蒜蓉、乾蔥蓉，
加魷魚快炒數十下，落少半碗水加鑊蓋焗至番滾後盛起備用；
原鑊加什丸、魚蛋、豬皮和調味煮10分鐘，最後落魷魚煮至番滾，
如汁多可用2茶匙粟粉水埋獻便。
P.S.附上姨甥女祈祈出世後17日相片
沒有留言 :
張貼留言
如果大家覺得我煮嘅餸菜啱哂口味嘅話，不妨留個言，鼓勵下我啦!