酥炸蠔餅

母親大人佢哋話咗好耐想食我整嘅酥炸蠔餅，

我見襯噚日咁齊人，

即刻去街市買咗1斤蠔仔($40)呀!

今次冇買鴨蛋，

用咗雞蛋嚟整，

整咗一大盆炸蠔餅，

個個食到Lam Lam脷呀!

材料: 蠔仔1斤、雞蛋4隻、蔥粒、蕃薯粉5~6湯匙、麵粉2湯匙、

水適量(視乎粉漿杰度)、生粉適量

調味: 鹽適量、胡椒粉適量、油少許

做法: 將蠔仔倒入一碗內浸清水，用手輕輕將蠔仔洗淨後隔去水份；

加入生粉洗淨蠔仔表面(要用手指摸吓仲有冇碎蠔殼)，浸洗蠔仔備用；

燒熱水放入蠔仔灼至轉色或半熟(約30~45秒)，隔去水份後待涼備用；

先將雞蛋發勻；準備一個大碗放入蕃薯粉、水、雞蛋和調味，

攪至粉漿冇粒粒後，加入蠔仔、蔥粒和油輕輕攪拌；

燒熱鑊落多少少油，將蠔仔粉漿分5~6次落鑊，半煎炸至兩邊金黃色上碟，

配埋椒鹽或魚露點嚟食就得。

~洗蠔仔要好輕手去洗，唔好用水大大力沖洗，因為好易洗爆蠔仔肚，

咁D鮮味就會走哂架啦!

~煎蠔餅唔好一次過落哂D粉漿，太厚身個煎蠔餅就唔好食架喇；

~煎蠔餅時，可以用鑊鏟將已定型嘅蠔餅界開幾份，咁就易D將蠔餅反轉，

中間嘅蠔仔更易熟呀!

~其實炸蠔餅，可以落鴨蛋架，蛋香味比雞蛋會出好多架!

~今次重手落咗4隻蛋，下次可以落2~3隻蛋就得呀!

呢兩日facebook block咗我，

所以入唔到去呀!😢😢😢