冬瓜蝦乾魚肉釀豆腐卜煲

今日整咗個冬瓜蝦乾魚肉釀豆腐卜煲，

加埋我至愛嘅粉絲，

粉絲當飯食，

好飽肚架!

蔥花雞蛋煎餃

老公係飯桶，

一餐半餐唔食飯就得，

如果幾餐冇米落肚佢會唔習慣喇!

而我呢，

可以一粒米唔落肚都冇問題呀!

所以每餐一定要煮飯架!

今晚除咗煮飯外，

我仲整埋我至愛嘅蔥花雞蛋煎餃，

咁就大家都開心啦!

氣炸雞膇

今朝老公話要食炸雞髀，

OK啦!

不過炸嘢好似熱氣D喎!

於是改用空氣炸鍋嚟炸雞髀，

冇咁多油亦好似冇咁熱氣呀!

老公話炸雞髀好味，

但佢問點解D雞髀咁細隻???

哈哈，

因為我驚雞髀太大隻難熟，

所以買咗雞膇嚟整囉!

食落口感都係一樣啫!

先用氣炸鍋炸4隻雞膇，

其餘2隻留俾小魔怪食呀!

一個人的晚餐~紫菜餃子粉絲湯

今日又係我一個人的晚餐，

簡單煮我至愛嘅紫菜餃子粉絲湯；

10隻餃子和1包粉絲，

加棵唐生菜和半片紫菜，

仲有加咗辣椒醬和蝦仁菜脯添!

煮起一大碗，

我竟然食唔哂!

唔通我細食咗???😁😁😁

土魷蒸肉餅

今日食土魷蒸肉餅加碟油菜添!

我哋2個人食飯好簡單，

唔需要太復雜啊!

破記錄

嘩嘩嘩!

今次真係破哂我嘅記錄呀!

噚日朝10點半係天貓超市落單，

今朝11點左右就送到落嚟天水圍屋企，

從未試過咁快囉!

仲有係俾我左計右計下，

終於買到唔超過10kg貨品又over249人民幣，

可以免運費一毫子都唔使俾，

又慳唔少錢啦喂!

新顏色

 

今日中午去整頭髮，

新顏色兼做咗卷髮，

雖然D頭髮好快會直番哂，

但俾我靚一日都好吖!

返到屋企都成5點幾，

懶得去煮餸，

只好買份燒味套餐，

半隻燒鴨和半斤燒腩仔$130，

煲飯灼菜就開得飯啦!

歐式天然酵母麵包制作精選實習中班~第五堂

第五堂，

馬鈴薯皇冠麵包&合桃玉桂猴子麵包。

西洋菜咸鴨腎粟米紅蘿蔔排骨湯

我今日好乖，

早早買定材料煲湯；

呢煲湯材料費都唔平，

1斤半西洋菜$20，

差不多$90排骨，

咸鴨腎4個$16，

栗米加紅蘿蔔$11，

成本起碼$137(仲未計南北杏和蜜棗嘅價錢)，

好彩我哋食埋湯渣，

計起嚟都抵番哂呀!

金包銀蝦皮炒飯

金包銀蝦皮炒飯，

嘩，

聽個名好似好高級咁喎!

但其實咪即係蝦皮雞蛋炒飯囉!

哈哈，

齋食炒飯好似好寡，

加幾片噚日食剩豬頸肉放入飯面，

成碟飯即刻升呢呀!

香煎豬頸肉

諗諗下，

我真係好耐冇食過豬頸肉喇!

今日就買咗兩塊嚟食，

配埋碟香辣魚露汁，

又真係幾惹味架!

不過豬頸肉唔可以成日食，

一年食一次好喇!

蒸水蛋

平時大魔怪真係好少係屋企食飯，

所以噚日佢係屋企食飯真係好少有呀!

佢除話想飲蕃茄薯仔素湯外，

仲要求食蒸水蛋呀!

哈哈，

呢個要求又真係好簡單喎!

蕃茄薯仔紅蘿蔔粟米栗子素湯

 

大魔怪點名話要飲上次煲過蕃茄薯仔素湯，

今次加埋粟米落去一齊煲，

呢個湯真係好好飲，

又唔嘥材料，

所有材料都食得，

真係一D都唔浪費呀!

重陽拜山

今日返元朗舊屋後山拜山，

天朗氣青冇落雨，

太好了!

拜山後落元朗成記食午餐$146，

成年冇嚟過，

豬扒和雞翼一樣咁好食呀!

順便去新順興，

買咗盒鵝翼、腎、腸和豬耳$145，

今晚加餸呀!

家常便飯

 

打完風後呢兩日我作病失咗聲，

完全冇動力去煮飯呀!

好彩老公都有幫手洗米煮飯，

不過呢，

佢煮飯落咗好多水，

好似煮粥咁囉!

我就負責簡單炒兩個菜就開飯喇!

菜芯炒魚片&梅菜蒸豬肉餅。

歐式天然酵母麵包制作精選實習中班~第四堂

第四堂，

水果麵包&天然酵母全麥吐司。

繼續打風餐

今日8號風球，

繼續煮打風餐，

摷下屋企物資，

簡簡單單煮咗兩餐呀!

打風餐

上星期六先掛完8號風球(獅子山)，

今日星期二又嚟迎接另一個8號波(圓規)喇!

街市和超市都超級多人，

打一日風啫，

使唔使買成車嘢呀!

我睇見都怕怕，

咩都冇買就返屋企囉!

屋企有物資，

唔使驚餓死呀!

客家蘿蔔蛋角煲

 

冇得返惠州，

食唔到好味道嘅客家菜，

唯有自己動手煮個客家蘿蔔蛋角煲，

止下癮先啦!

黃豆醬支竹蘿蔔炆牛腩

 

一個星期連續打兩次風，

真係好少見呀!

走咗颱風「獅子山」嚟緊就有「圓規」；

買定凍肉放係凍箱，

咁就唔使落街都有飯開啦!

食飯盒

今日香港掛起3號風球，

外面超級大風又大雨，

黃紅黑雨都出齊，

呢個颱風雨帶都幾犀利呀!

噚日網上預約今日中午去續辦回鄉證，

已經係網上已經填好資料，

去到現場影埋張相靚$50有6張，

(依家影回鄉證相要有barcode架!)

申請全電腦化，

scan回鄉證和身份證，

嘟埋相片嘅barcode，

咁就等去櫃位辦證喇!

好方便，

去到櫃位簽名和交錢就得($390)，

唔想自己去攞，

加$40就郵局寄掛號送到屋企。

辦完證仲落緊雨，

拿拿聲返屋企樓下商場買飯盒，

買咗2盒2餸飯$78，

好大盒食唔哂，

又可以分兩餐食呀!

雪梨乾山楂洛神花甜菊葉水

每次去粉嶺坪輋雲泉仙館，

我都會去後門小攤檔買小食手信架!

去到必叫亞姐幫我執包$20雪梨山楂甜菊葉煲水嚟飲，

今次亞姐加埋洛神花俾我添呀!

酸酸甜甜似利賓立味，

雪凍佢好好飲架!

粥粉麵飯

呢幾日我和老公都係食雜糧，

炒下飯煮下螺絲粉，

今日就食餃子烏冬，

越食越簡單呀!

氣炸五香淮鹽雞翼配薯條

 

今晚我要返學，

摷下雪櫃睇下有咩物資煮定晚餐俾老公食先得。

有7隻雞翼加個薯仔應該夠佢食啦!

雖然薯仔氣炸都唔脆，

但我一滴油都冇落，

呢餐夠哂健康啦!

歐式天然酵母麵包制作精選實習中班~第三堂

 

第三堂，

維也納藍莓忌廉芝士包&紅茶杏仁提子英式吐司。

南乳蓮藕木耳炆豬手

响天盛街市買咗隻冰鮮豬手，

$40隻又唔貴喎!

加埋蓮藕和木耳，

炆咗一大鍋南乳蓮藕木耳炆豬手呀!

一餐食唔哂，

分咗2餐食呀!

國慶兼姨甥仔生日

噚日我哋入咗沙田，

去姐姐家慶祝姨甥仔亞諾23歲生日呀!

大個仔大學畢業，

已經出嚟做嘢啦!

姐姐準備咗好豐富嘅生日晚餐，

辛苦哂呀!