沙爹粉絲蝦煲

清哂啦!

今晚終於清哂中秋節燒烤剩低嘅嘢食啦!

連食咗3日肉，

睇怕要停一排唔食豬扒和雞翼喇!

今晚整沙爹粉絲蝦煲，

都係燒烤時食剩嘅食物之一，

蝦煲辣辣哋，

超級惹味呀!

附上呢幾日食過嘅燒烤食品

材料: 蝦12隻、粉絲適量、洋蔥半個、蔥段、乾蔥頭、蒜蓉、清雞湯1碗半

調味: 豉油1茶匙、老抽半湯匙、糖1茶匙、麻油少許、胡椒粉適量

做法: 蝦去頭去鬚挑蝦腸，用洗淨後用廚紙索乾水份；粉絲浸軟備用；

乾蔥頭切片備用；燒熱鍋落油，放蝦入鍋內煎至蝦兩面轉色後撈起；

原鍋落少許油加洋蔥、乾蔥片、蒜蓉和沙爹醬1湯匙爆香，

落調味和清雞湯煮滾後，加蝦和粉絲煮至差不多收8成汁，

最後加麻油撈勻，落埋蔥段後熄火，唔好開蓋焗1分鐘後便成。

~煎完蝦唔好洗個鍋，因為鍋內有大量蝦膏油，煮粉絲時索哂D蝦膏汁，

所以特別惹味架!

~粉絲我係用雜貨舖買嘅散裝粉絲，我鐘意佢哋係100%綠豆造外，

食落仲特別爽口添架!

  

大家可以入嚟Facebook讚下我新開嘅Fans專頁呀!

雀后(添飯)Facebook Fan Page