朱家豬腳薑!

 

男人老狗都鐘意食豬腳薑???

係呀，

我家3個男人超鐘意食囉!

上次妹妹生完祈祈BB後，

我將食剩咗嘅豬腳薑攞咗番屋企，

加D甜醋、豬手和蛋落去繼續煲，

食到佢哋lam lam 脷呀!

9 個月後嘅今日，

朱家豬腳薑又出場啦!

甜醋都有幾隻唔同牌子，

八珍、同珍和鉅利，

母親大人用嘅係鉅利(佢話好好食喎)，

我用嘅係同珍(經濟又實惠)，

至於八珍就較為出名啦(個人覺得好甜呀)，

由於唔係坐月食嘅薑醋，

所有煲薑嘅時間可縮短。

材料: 薑3斤、豬手、豬腳各一隻、蛋12隻、鹽少許、冰糖3小粒

調味: 同珍甜醋5公斤裝、同珍黑糯米醋1碗

做法: 首先將薑刮皮後洗淨，風乾1-2日備用；

將薑遂一拍扁，燒熱鑊不用落油將薑煎煎兩面和加少許鹽炒至收水，

把薑逐一放入煲內加3/4樽甜醋煮滾煲2小時後熄火，(醋需浸過薑面)

每隔2-3日煲滾薑醋20分鐘後熄火，

如是者煲一星期或以上(用嚟坐月就起碼要煲一個月啦!)；

食前一日將雞蛋煲熟去殼，豬手和豬腳出水，

燒滾薑醋後加1碗黑糯米醋、冰糖和豬手豬腳煲1小時，

(黑糯米醋即係酸醋，份量多少要自己調較o架!)

(加冰糖係想豬手豬腳快D腍呀!)

再加雞蛋煲多10分鐘熄火，盡量將雞蛋、豬手豬腳浸入醋中；

浸一日一夜後再翻滾就食得，

想繼續煲嘅話，可自行加豬手豬腳、蛋和甜醋入煲再煮滾1小時，

隔日便食得o架啦!

P.S.煲薑醋要用瓦煲或玻璃煲，鐵煲係唔用得o架!

每次我翻滾D薑醋，

大小魔怪都會問食得未呀???

得啦，

今日終於食得啦!

 

 

大家可以入嚟Facebook讚下我新開嘅Fans專頁呀! 

雀后(添飯)Facebook Fan Page