醬香牛筋腩肚

今日炆咗一大鍋醬香牛筋腩肚，

今次冇落柱候醬，

剩係落咗黃豆醬、辣豆瓣醬、蠔油、豉油、老抽和冰糖，

仲有加咗個鹵水包落去一齊炆，

呢個牛筋腩肚真係簡單又易做，

我留起咗部份牛筋腩肚，

聽日用嚟煮麵食呀!

木耳雞蛋豬肉餃

唔知係咪最近covid病毒弱咗好多呢???

老公前兩日有少少病症外(流鼻水和骨痛)，

今日佢話已經冇咩事，

佢連續兩日朝早食咗4粒蓮花清瘟，

行得食得走得又痾得，

雖然自我檢測仍然係兩條線，

不過佢有信心過多兩日就會好番哂架啦!

今日我又買咗豬肉碎嚟食餃子，

用咗上次剩番嘅餃子皮，

包咗52隻木耳雞蛋豬肉餃，

午餐煎咗10隻餃子嚟食，

又幾好味道喎!

荷蘭豆炒臘腸臘肉

呢幾日都老公感到有D唔舒服，

流鼻水和周身骨痛，

冇發燒不過感覺沾寒沾凍，

佢即刻check下有冇中招，

Oh no，

雙紅線!!!

食咗一日粥，

今晚炒咗碟小菜俾佢送粥呀!

韭菜雞蛋豬肉餃子

今日我突然好想食餃子，

於是即刻拿拿臨買材料嚟包餃子喇!

買咗約1斤半皮$20，

1斤豬肉碎和$5韭菜，

炒咗3隻雞蛋(切碎)加埋落去做餃子餡，

呢度包咗63隻餃子咋!

仲有餃子皮剩，

明天再買料包其他餡先得。

午餐煮咗18隻餃子嚟煮河粉，

其餘的放入冰箱，

隨時再食都得呀!

新春行大運

今日約咗老公舊同學一齊飲早茶，

之後就由元朗西鐵站行入去大樹下天后古廟；

途經元朗熱門打咭點~綠色隧道，

緊係要影相留念啦!

適逢今日正月十五，

好多善眾入嚟大樹下天后古廟拜太歲，

香火鼎盛，

人山人海!

附近木棉花盛開，

好靚呀!

食埋個下午茶就返屋企囉!

蝦醬肉粒蝦仁蛋炒飯

 

今晚食炒飯，

雪櫃有咩就攞嚟炒，

豬肉粒、蝦仁、雞蛋和蔥粒，

仲有我至愛嘅蝦醬，

炒埋一齊就食得啦!

朱家小炒

朱家小炒，

鐘意食邊款呀???

魚香茄子、XO醬西芹蝦仁炒肉片、韭菜花炒魷魚肉片。

麻辣手撕雞

噚日大小魔怪叫咗半隻外賣手撕雞，

份量少到我哋3個人夾咗幾次已經冇哂，

食得超唔夠喉囉!

所以我今日即刻買咗1隻冰鮮雞嚟整麻辣手撕雞，

隻雞拆完肉舖滿成個碟，

淋上麻辣油和炸花生粒，

越食越惹味呀!

西洋菜咸鴨腎紅蘿蔔粟米煲西施骨

 

老公話好耐冇飲西洋菜湯，

今日見有西洋菜賣，

拿拿臨買咗2扎，

仲買埋南安鴨腎，

煲咗西洋菜咸鴨腎紅蘿蔔粟米煲西施骨，

呢個湯係朱家例湯之一嚟架!

話時話，

今日天氣超級潮濕又冇風，

煮完餐飯我成頭和身都出哂汗，

唔知係咪我有病呢???

遊花園

今朝我行咗去天水圍公園賞花兼晨運，

老公話明有燈會，

夜晚去應該會好靚呀!

公園內某D範圍開滿花，

都幾靚架!

粟米魚肚羹

新年過後，

係咁食食食，

都係時候要食清淡少少啦!

今日簡單滾個粟米魚肚羹，

唔落肉，

簡單D呀!

客家蘿蔔蛋角煲

之前屋企剩咗半條蘿蔔，

用咗佢嚟整客家蘿蔔蛋角煲，

雖然煮呢個餸事前要煎蛋角，

準備功夫都唔少嘢，

但係食落好味，

咩都抵番哂啦!

屯門藍地~翠湖(嘉爵)園林酒家

今日我和老公約咗大伯大伯娘、姨甥仔夫婦，

一齊飲茶，

屯門藍地~翠湖(嘉爵)園林酒家，

呢餐食咗$604，

點心都幾大碟，

味道都唔錯喎!

之後入咗村睇壁畫，

好靚呀!

返惠州過年

2月12日星期一年初三，

我、老公和小魔怪齊齊返惠州過年，

我哋諗住住幾日，

大魔怪因為冇請假，

所以冇同我哋一齊返去呀!

我哋食埋午飯先返惠州，

返到屋企已經3點幾，

打掃完衛生後，

舒舒服服坐低睇新春節目和唱K，

小魔怪最開心就係可以唔使用VPN上網打機，

大呼~正呀!

大年初三

今日大年初三~赤口，

我、老公和小魔怪會返惠州過年，

大魔怪請唔到假，

所以冇跟我哋一齊返去呀!

講返噚日下午去咗妹妹家團拜，

順便慶祝祈祈13歲生日呀!

妹妹準備咗精美下午茶，

姐姐就準備豐富晚餐，

噚日由朝食到晚，

豐衣足食!!!

大年初二

今日大年初二，

一早起身準備開年飯，

5餸1湯加埋早餐嘅蘿蔔糕，

開飯啦!

食完開年飯，

又要出街拜年啦喂!

靜靜雞話俾大家知，

今日亦都係我和老公結婚31週年啊!

大年初一

今日大年初一，

我祝大家龍年行大運，

心想事成，

萬事如意，

身體健康!

朱家傳統年初一食全日齋，

簡簡單單5個素菜，

開得飯啦!

鮑魚沙薑雞煲

今日年卅十晚，

大小魔怪都放早返嚟食晚飯，

簡單煮咗個鮑魚沙薑雞煲，

好味又好送飯架!

今次用咗之前係爭鮮買嘅急凍有殼鮑魚，

除殼後洗乾淨就可以用嚟煮餸，

真係好方便呀!

大圍圍方~念月樓

噚日整咗蘿蔔糕，

今日中午我就出大圍，

攞咗個蘿蔔糕俾母親大人；

之前佢中咗covid，

成個星期都冇咩胃口，

好彩呢幾日開始食番嘢，

不過依家仲有幾聲咳呀!

擺底咗蘿蔔糕後，

母親大人話請我飲茶，

大圍圍方~念月樓，

母親大人一向對食好有要求，

啱佢口味嘅價錢稍貴都唔係問題，

食得開心就好。

2024朱家蘿蔔糕

 

今朝我開行turbo刨蘿蔔整蘿蔔糕，

6斤多蘿蔔，

加埋切臘味，

整完成身散哂，

今次唔認老都唔得囉！

炸腰果&炸蝦片

今日又係賀年炸腰果和蝦片嘅日子，

今年炸咗一斤半腰果，

和半盒印尼蝦片呀!

炸腰果大樽留俾自己食，

其餘嘅裝哂俾姐姐呀!

嘉湖海逸酒店~潮潮居

今晚我和老公去參加義工團年飯，

嘉湖海逸酒店~潮潮居，

呢圍$3888(未計茶芥和加一)，

味道都可以啊!

2024朱家團年飯

今日係2024朱家團年飯，

但前4日，

母親大人中咗covid，

所以冇入嚟天水圍同我哋一齊團年，

而姐姐姐夫和妹妹一家三口，

都有出席，

來年祝大家身體健康!

彩椒豆角炒肉片

前兩日見到有呢款大豆角，

菜檔亞姐話好爽脆，

於是買咗$10嚟試下，

今次煮彩椒豆角炒肉片，

只得一個餸，

夠哂我和老公食啦!

禿黃油蟹黃拌麵

 

今日終於試咗呢盒响山姆買嘅禿黃油蟹黃拌麵。

1盒有3包，

每包有禿黃油(蟹黃蟹膏)、

蟹粉醬(蟹黃蟹肉)、

蟹醋汁和生干麵；

將兩包禿黃油和蟹粉醬浸入燒熱咗嘅滾水內浸熱，

再按包裝指示灼熟麵條，

最後禿黃油和蟹黃醬淋係麵條上，

再灑上適量蟹醋汁，

撈勻食得，

好味道呀!

返新屋

噚日我同老公返大亞灣新屋，

之前我哋來回都係call滴滴，

車費百五蚊咁上下，

都唔平架!

但今次就試下新路線，

我哋係蓮塘口岸附近搭京橋巴士，

去十里銀灘~梵高的海站下車，

每位22蚊人仔咋!

再call滴滴車過去都係廿皮左右，

兩人返去大亞灣單程都係62蚊人仔，

以後，

我和老公返去都會選擇呢條路線呀!