菜脯肉碎煎蛋

 

今日買咗半磅豬肉碎，

諗住整幾個唔同款嘅餸菜，

今日就整咗菜脯肉碎煎蛋；

呢個餸非常簡單，

適合唔知煮咩餸，

又或想加餸時，

只要有齊材料就可以整嚟食喇!

蟲草花冬菇蒸雞肉

今晚食蟲草花冬菇蒸雞肉，

雞髀肉去皮去肥膏，

蒸出嚟冇咁油膩，

好健康架!

食番夠本

今朝10點45分我去咗元朗政府合署睇牙醫，

由於要做深層洗牙，

所以今次要打麻醉針呀!

打完麻醉針後

右邊面冇哂知覺，

就連食午餐都好困難囉!

餓咗大半日，

晚餐我就要食番夠本啦喂!

荷蘭豆炒臘肉、涼瓜炆排骨和豉油雞翼+雞腳。

 

又嚟，病

大魔怪又又又感冒了，

喉嚨痛、流鼻水、喉沙兼頭痛，

睇咗醫生，

食咗藥就係咁瞓，

午餐食通粉，

晚餐我就煲咗皮蛋瘦肉粥、榨菜蒸豬肉和灼菜芯。

豉汁蒸排骨

今日買咗1條仔腩排($29)嚟蒸豉汁排骨，

雪櫃有少少銀芽，

加埋落D排骨度一齊蒸，

灼多碟菜芯就開得飯喇!

簡單又好味道呀!

馬拉盞肉碎炒通菜

噚日買咗2扎通菜，

一扎炒咗蝦醬通菜鮮魷，

今日就整馬拉盞肉碎炒通菜，

呢個餸咸咸香香，

真係好送飯架!

大小魔怪28歲生日會

上星期六係大小魔怪28歲生日，

今日約埋黃氏一家和大魔怪女朋友仔，

合共12人齊齊慶祝佢哋生日呀!

响屋企附近餅店訂咗個足料嘅生日蛋糕，

我哋訂咗2磅蛋糕$290，

但餅店造出嚟嘅蛋糕足足有5磅幾，

真係超級巨型和抵食呀!

我哋12個人只係食咗半個蛋糕，

仲剩半個蛋糕係雪櫃呀!

冬菇臘腸蒸雞肉

今日係冰箱摷到1塊雞扒，

用嚟煎又或蒸都唔夠食，

好彩有小魔怪平時食開嘅小雞胸肉，

加埋幾隻冬菇和1條臘腸，

咁就蒸咗呢碟冬菇臘腸蒸雞肉喇!

腐竹薏米雞蛋糖水+外賣晚餐

今晚晚餐雖然叫咗外賣，

但我都冇偷懶架，

煲咗我哋成家都鐘意飲嘅腐竹薏米雞蛋糖水，

食完D辣辣哋嘅嘢，

食番碗甜甜嘅糖水中和番佢呀!

榨菜蒸牛肉

今日去牛肉檔買咗$45牛肉，

叫肉檔哥哥幫我切埋D牛肉(我懶得自己切呀)，

買埋包即食榨菜，

整呢碟榨菜蒸牛肉，

灼埋碟菜芯，

咁又一餐囉!