家裡口罩存貨量唔多，
大約有120個左右啦!
為咗慳D用口罩，
呢排我通常會買多幾日餸，
菜唔擺得耐咪買瓜囉!
好在大魔怪可以留係屋企homeoffice，
而平日我會準備3個口罩俾小魔怪返工用的，
下星期我會勤D整飯盒俾小魔怪帶返工，
咁佢中午就唔使出街食飯，
可以再慳多1個口罩喇!
希望口罩快D返貨，
唔使我哋咁緊張去撲買口罩啦!
依排病菌多多，
聽講馬來西亞嘅肉骨茶有中藥成份，
有助提高免疫力架!
咁唔好遲喇，
拿拿臨煲番煲嚟嘆下先得!
新年期間，
所有食材都貴咗好多，
廿幾卅蚊斤菜都係閒閒哋咋!
就連最普通嘅椰菜，
今日竟然賣25蚊個，
嘩，
搶錢咩???
退而求其次改食油麥菜，
不過都唔平廿蚊斤呀!
加埋罐豆豉鯪魚一齊炒，
連粒豆豉都唔好嘥呀!
今日大年初四，
母親大人和妹妹一家又嚟我屋企喇!
點解嘅???
原因係初二晚，
小魔怪唔見咗部手機，
懷疑漏咗個係妹妹家，
妹妹佢哋搵咗好耐，
終於係個梳化一個好隱蔽嘅地方搵到，
今日襯有時間就攞入嚟俾小魔怪喇!
今日大年初三，
本來預咗返惠州過年，
但因肺炎疫情嚴重，
所以取消回鄉留港過節，
臨時約咗大伯大伯娘和姑奶新抱淇淇嚟打麻雀兼食飯，
家常便飯，
招呼唔到呀!
今日係大年初二，
一家四口子食過簡單開年飯後，
又要出外拜年喇!
今年出外拜年，
記得戴口罩而唔係帶口罩呀!
今日大年初一，
祝大家身體健康，
龍馬精神，
財源滾滾，
萬事如意，
心想事成!
朱家傳統初一食全素，
小魔怪話呢餐飯好似少咗D嘢咁喎!
哈哈，
大家明佢講哂啦!
今日送蘿蔔糕俾母親大人，
適逢妹妹、妹夫和祈祈都開始放年假，
於是相約一齊去西貢閒遊，
呼吸新鮮空氣!
今日天氣都唔錯，
仲好鬼曬添呀!
今日年廿八，
除齊齊洗邋遢之外，
我仲整埋蘿蔔糕添呀!
一早起身切切切，
忙忙碌碌又半日喇!
原本呢碟豉油皇煎蝦係團年果日食架!
點知當日煮到失哂暈，
唔記得咗有呢碟餸，
就係咁豉油皇煎蝦做咗我噚晚嘅晚餐喇!
