元朗長來食坊~重慶辣雞煲!

 

昨日係我同老公結婚19週年紀念，

我哋約埋姑奶一齊食飯。

食咩???

就係我想食好耐嘅辣雞煲啦!

由於我仲咳咳哋，

所以揀咗少少辣嘅重慶香辣雞啦!

(辣:分小、中和大辣)
原來少少辣都係辣o架，

一定要叫定支冰凍啤酒和汽水呀!

咪睇呢個煲好似好少咁，

初初我哋都懷疑有冇一隻雞嘅份量，

點知我哋3個人食到最尾個煲都仲有雞，

就知道佢好足料，

又夠哂惹味，

好辣嘅朋友一定要嚟試吓；

位置係元朗屏樂徑近水邊圍村呀!

提提大家，

呢間舖頭都幾多人食，

仲擺到成條街都係枱，

想搵個好位就要早D嚟啦!

福建炒飯

前幾日巡blog時，

見blog友仔食福建炒飯，

諗起我都好耐冇整過嚟食啦!

今日即刻動手整嚟嘆吓先得!

上湯浸鮮竹卷!

真係好耐冇整過茶樓美食啦!

近排同母親大人係沙田飲茶，

食咗個好好味道嘅上湯浸鮮竹卷，

今日我就試吓自己整嚟食先得!

其實用咩材料都得，

只要啱自己口味就OK啦!

最重要呢個餸好鬼清，

一滴油都唔使落o架! 

 

違禁品~蜜糖黑椒烤雞翼!

 

其實以我咁咳嘅情況下，

係唔可以食雞o架；

拔，

食咗咁多日豬肉、魚、菜，

人哋真係好想食雞嘛，

唔食成隻雞，

食雞翼都好吖!

今次加埋蜜糖一齊醃，

雞翼甜甜哋特別好味道呀!

情人節表心意~心心pizza!

就嚟到情人節啦，

大家有冇idea點慶祝呢???

為表對愛人嘅心意，

親自下廚就最好不過啦!

俾個參考大家啦，

心心pizza，

係唔錯嘅選擇嚟o架!

甜甜糖不甩!

 

今日是農曆正月十五日~元宵節!

家家戶戶吃湯圓，

代表人月兩團圓!

今次我唔係整芝麻湯圓，

而係整簡單又好味道~糖不甩!

願天下有情人吃過糖不甩，

打風都打唔甩呀!

 

雜錦壽司!

 

係過年前，

大小魔怪已經話想食壽司，

今日終於完成咗佢哋嘅心願，

見佢哋食得咁開心咁滿足，

雖然我仲病梗，

不過辛苦少少都值得呀!

56件壽司，

唔使10分鐘就食哂啦!

 

食得清淡~紹菜冬菇炒韓式年糕!

 

咳咗幾日，

噚日終於去睇咗醫生，

食完藥之後就大昏迷，

越瞓越想瞓呀!

食咗兩日粥，

口淡淡，

炒個清清哋嘅餸，

簡單又飽肚呀!

心心相印~圓肉杞子桂花糕!

近排愛上桂花嘅香味，

今次就用佢嚟整咗呢個心心相印~圓肉杞子桂花糕，

呢兩個心心，

代表我對愛人嘅心意啊!

 

梅菜炆排骨!

 

人就係咁衰o架啦!

唔返工都嚟唔病，

一話返工啫，

前一日已經開始咳咳咳呀!

唔想攪咁多嘢啦，

是但煮碟餸送粥食算囉!