2011年2月3日 星期四

大年初一~食齋日!

 
今日係大年初一,
朱家傳統是食齋日。
今年煮嘅齋菜和上年差不多,
不過一樣咁好味呀!
食完早飯後,
係時候出外拜年啦!

2011年2月2日 星期三

團年飯!

 
我開始放假啦!
由今日起放到2月14日情人節先返學,
超爽呀!
今晚係朱家食團年飯嘅大日子,
母親大人和妹妹妹夫都嚟我屋企齊齊團年,
所以一早起身準備買餸呀!

新年快樂!




 今日係年三十晚,

我雀后祝大家:

心想事成!
身體健康!
萬事如意!
步步高升!
笑口常開!
財源滾滾!
新年快樂!
而我嘅新年願意係~繼續雀壇無敵手呀!
 

大家可以入嚟Facebook讚下我新開嘅Fans專頁呀! 

2011年2月1日 星期二

我很醜,但我很好味~炸蛋散!

 
今日學校舉行新春慶祝會,
每位老師都會分工合作,
構思不同的賀年遊戲和活動,
讓家長和小朋友能有個愉快的早上。
今年我又係負責有關食的攤位~糖不甩和炸蛋散!
今次搓呢個蛋散粉糰個個家長都讚好味道,
唔太甜,
我好滿意啊!


2011年1月31日 星期一

元朗~正記菜館!

 
返埋聽日就放假啦!
今晚同校長和同事一齊食飯,
去咗同事嘅弟弟做嘢嘅地方食飯。
呢度晚晚好旺o架!
好多人會嚟呢度食晚飯和宵夜,
我哋早到所以可以坐二樓,
冇咁凍呀!
識人係唔同嘅,
D餸份量好大碟,
而且樣樣都嘢食都好好味,
我哋14個人不停咁食,
最後都係食唔哂。

2011年1月30日 星期日

印尼炸蝦片!

 
每逢過年,
老公一定要我炸印尼蝦片,
佢話好好食之外,
用嚟招呼人客都好嘛!
炸印尼蝦片我最拿手,
燒滾油,落蝦片,等佢浮起即用筷子或用鏟壓平蝦片,
撈起用抹手紙索油,
食唔哂用密實袋裝住就得!

又嚟蒸糕~自家製蘿蔔糕!

今朝7點幾,
我帶埋工人姐姐去街市買蘿蔔,
嘩!菜檔已經有幾十人買梗菜,
可能家家戶戶都係今晚團年嘅關係。
今年蘿蔔又係3蚊2斤,
聽同事話元朗有地方賣1蚊1斤呀!
買咗5個大蘿蔔有成10斤幾重,
用咗3個半蘿蔔約6斤,
整咗3個"削"嘅蘿蔔糕,
呵呵呵!我超鐘意食呀!

2011年1月29日 星期六

金滿棧!

 
今日我哋同母親大人提早團年,
經過上次過冬至的經驗,
母親大人話煮得辛苦,
呢次唔煮出街食。
佢搵咗間超抵食嘅舖頭,
價錢合理兼份量大碟,
雖然唔係咩名貴菜式,
不過飽到我哋食唔落,
仲可以打包兩盒餸攞番屋企。
呢間金滿棧係母親大人屋企附近o架!
埋單仲唔使加一添!


2011年1月28日 星期五

燉奶佬!

 
明天是學校家長日,
今晚要留校準備,
放工後與同事一家三口去燉奶佬食飯,
3餸3飯3湯3熱綠茶,
都係$114咋!



2011年1月24日 星期一

愛心馬蹄蒸肉餅!

呢個星期超級忙呀!
因為嚟梗星期六幼稚園要派成績表,
又要開始準備學校下星期二嘅新年party,
真係想偷懶都唔得呀!
今日親手剁咗個馬蹄豬肉餅俾大小魔怪食,
仲好攪鬼咁整咗個心型肉餅,
成個普通蒸肉餅即刻升呢呀!