今日又有靚湯飲喇!
沙參玉竹蓮子百合淮山螺片煲豬腱，
我仲加咗瑤柱龍眼肉和蜜棗一齊煲，
呢淡湯好濃好香好好飲呀!
噚晚買嘅燒味套餐實在太豐富，
我、老公和小魔怪根本食唔哂，
所以我將食剩嘅叉燒切絲，
用嚟炒咗呢個瑞士汁叉燒炒烏冬，
做咗我和老公嘅午餐呀!
今日老公係屋企附近商場地下果間燒臘店，
買咗個燒味套餐，
燒鴨半隻和叉燒半斤，
仲送4隻豉油雞翼，
都係$135，
真係好抵食架!
呢排天氣真係好熱，
日日都係35、36度，
所以我決定剪短頭髮喇!
今朝由早上9點坐到下午2點45分，
歷時5個小時45分鐘，
先剪短頭髮後局部漂染，
再做頭髮焗油兼拉直頭髮，
之後將頭髮染奶茶色和髮根染深色遮白頭髮，
仲有兩鬢染粉紅色，
好複雜呀！
打風前我已經買定紅腸做儲備，
不過儲備太多食物，
未有時間食呀!
今日終於有機會食，
係因為小魔怪突然話要返嚟食晚飯呀!
之前淘咗樽咸蛋黃醬返嚟，
今日就用佢嚟整咗咸蛋黃雞翼，
食落咸蛋黃醬唔係好咸，
但又有食咸蛋黃嘅流沙感覺，
又幾好喎!
今晚得兩個餸，
榨菜蒸豬肉和灼菜芯，
簡簡單單又一餐!
呢排天氣真係唔知攪咩，
一時落大雨，
一時就曬到七彩，
日日34~35度，
熱到有哂胃口，
兼悶到唔想煮飯呀!
今日去豬肉檔買豬肉，
我叫肉檔哥哥幫我切3片梅頭肉$50，
梅頭肉用嚟整叉燒或豬扒就用啱啦!
今次我整叉燒呀!
懶得開焗爐和氣炸鍋，
最後落鑊慢慢煎，
都唔錯架!
今日大暑，
經過菜檔買咗2斤冬瓜嚟煲湯，
冬瓜連皮一齊煲，
有助祛去水腫呀!
呢排街市賣嘅韭菜花特別脆嫩，
我買咗8蚊份量都唔少，
加咗甘筍、豬肉絲、魷魚乾和蝦乾一齊炒，
好惹味呀!
今日香港經驗8、9、10號風球，
再轉8和3號風球；
我早上落街唔覺大風但有雨，
食埋早餐就返屋企喇!
之後颱風來了，
天水圍大風又大雨，
老公自己落街感受10號風球嘅威力，
真係超級大風呀!
行路都有困難，
佢唔敢行遠，
只係附近行咗人個圈就返屋企啦!
打風就簡單煮，
豆豉鯪魚炒油麥菜、
豉汁涼瓜炒排骨、
香煎三文魚。
今日黃昏，
兩仔爺又去操車喇!
今次先去蝴蝶灣停車場練泊車，
來來回回練咗好幾十次，
小魔怪越來越進步了，
又去咗屯赤看日落；
之後揸車去洪口橋食晚餐~大發餐廳，
食飽飽落大雨，
佢哋車我先返屋企，
然後繼續去操車呀!
今日小魔怪終於攞咗部車喇!
我哋係元朗公園附近揸車，
之前老公揸慣日本車，
對歐洲車完全唔熟悉，
而且又冇揸車幾年，
所以真係要練多幾次車先可以出大馬路呀!
泊好部車，
就去天盛銀龍食晚餐，
今餐食咗$175。
今日煲咗青紅蘿蔔粟米螺片湯，
呢個湯全部材料都食得，
老公最鐘意架喇!
因為佢唔想嘥嘢，
可以食哂落肚就最好啦!
之前買咗包蛋炒麵，
今日就用佢嚟整咗呢碟菜芯雞絲炆麵，
我煮咗兩個麵，
我和老公兩個人食量唔多，
啱啱好呀!
屋企有兩條幼身茄子，
用嚟炒係唔夠食，
所以今餐蒸麵豉排骨時，
用佢嚟舖底一齊蒸，
咁呢個餸就有茄子又有肉啦!
小魔怪一向都係食肉怪獸，
所以每次佢係屋企食飯，
多多肉係唔少得架!
今餐有1磅肥牛煮俾佢食，
應該夠佢食啦!
近期食過咩，
有買外賣，
又有自己煮，
總之以簡單為主啦!
其實我都幾鐘意煮炒粒粒嘅餸，
今日我就買咗$10豆角，
用咗一半嚟炒粒粒，
呢碟炒粒粒有豆角、豬肉粒、洋蔥和雞蛋，
全部炒埋一碟，
撈飯食一流架!
噚日小魔怪WFH，
我除咗煲湯外，
仲煮咗佢至愛嘅黑椒牛仔骨添呀!
有黑椒汁和洋蔥撈飯，
今次仲唔添多D飯。
今日靚湯，
養生壺~花旗參石斛麥冬煲豬腱，
配淮山玉竹蓮子百合龍眼肉蜜棗；
將所有材料(除花旗參外)放入養生壺內，
加入適量水按煲湯功能，
煲到最後15分鐘落花旗參，
熄火後落鹽調味便成。
花旗參有補氣養陰、生津清熱；
石斛有補腎養肝明目；
麥冬有抗心肌缺血、保護心腦血管、降血糖等功效。
今日小魔怪終於做車主啦!
新牌仔唔使買咁貴咁靚嘅車，
等揸多幾年熟練下車技後，
再買新車都唔遲喎!
睇完車後，
老公請我哋去食飯，
慶祝小魔怪做車主，
小魔怪揀咗去正記食飯呀!
呢餐叫咗4個餸，
1碗白飯和2罐汽水，
加埋外賣盒一個，
呢餐食咗$533。
今日買咗4塊梅頭有骨豬扒，
用咗其中2塊整黑椒洋蔥豬扒，
估唔到2塊豬扒足夠我和老公兩個人食，
加埋黑椒汁，
老公添咗兩碗飯呀!
噚日執廚房，
見到仲有半包花生係度，
所以今日即刻買隻豬手返嚟，
用南乳炆咗一大鑊南乳花生炆豬手。
小魔怪攞咗車牌都有一段時間，
佢話想買架二手車嚟練練車，
之前佢同朋友睇咗唔少車架啦!
今日佢同埋我和老公一齊再去睇車，
睇中咗兩部車，
依家等佢好好考慮下啦!
之後去薩莉亞食咗個下午茶，
食飽飽就返屋企，
因為下面天氣好熱好焗，
呼吸都好辛苦呀!
7月2日星期三
上次我同老公一齊去大亞灣係4月初，
老公話好耐冇返去，
所以星期三就同佢返咗大亞灣住幾日。
响拼多多嘅多多買菜訂定D日常用品，
去到屋企附近超市攞貨，
好方便架!
仲有係蓮塘口岸買咗隻咸雞和菜，
加埋2包香菇燉雞麵，
咁就做咗我哋嘅午餐喇！
食飽老公又搵咗套戲慢慢睇，
而我緊係要眠一眠啦!
今日7月1日香港回歸28週年假期，
我哋黃氏家族又有聚會啦!
妹妹家現正進行大裝修，
暫時搬咗去馬鞍山海澄軒酒店居住，
酒店樓下有間天澄閣酒樓，
有得Book枱打麻雀，
兼食晚飯，
所以我哋約咗先食午餐，
之後直接去開枱打麻雀。
