今日午餐食意粉，
黑椒雞絲洋蔥炒意粉，
炒咗一大鑊，
夠食兩餐呀!
天氣熱，
我都唔想煮飯喇!
老公鐘意黃昏落街做運動，
順便叫佢買個兩餸飯返嚟，
咁又一餐囉!
老公有選擇困難症，
所以揀來揀去都係果幾款餸呀!
一隻雞分兩種食法，
今次就整咗客家咸雞，
咸雞醃咗一晚，
再點薑蔥一齊食，
好好味道呀!
呢排天氣熱，
我特別好想飲多D湯水呀!
今日呢個有個好長的名稱，
沙參玉竹蓮子百合淮山煲節瓜嚮螺頭豬腱，
配圓肉、瑤柱和蜜棗。
所有藥材都係屋企有嘅，
今日剩係買咗節瓜和豬腱呀!
今日買咗一隻雞返屋企，
斬開兩半，
一半用鹽醃成咸雞，
另一半就用蟲草花和雲耳一齊蒸，
一雞兩食，
唔錯架!
之前買咗盒硬豆腐返嚟都有好幾日，
都唔知煮咩好，
今日買咗$15豬肉碎，
煮咗呢碟蠔油豆腐燴肉碎，
我懶到豆腐都冇煎到，
就咁成舊豆腐放入鑊，
用個鑊鏟整散舊豆腐，
嘻嘻，
懶得就懶呀!
今日買咗3隻彩椒(紅綠橙色)收我7蚊，
1包金菇5蚊，
1斤芥蘭16蚊，
依家香港物價真係唔平囉!
屋企仲有2支乾腐竹和半碗豬肉碎，
今晚就炒咗呢碟腐竹木耳炒肉碎，
大大碟，
夠哂我和老公兩個人食呀!
今日用養生壺煲湯，
蓮子百合茨實麥冬伏苓粒淮山湯，
配豬腱、紅棗、瑤柱仔，
煲完老公和小魔怪每人飲咗2碗水，
好正呀!
今日見小魔怪係屋企食午餐，
簡單整咗榨菜肉絲蒸米粉一齊食，
呢個蒸米粉快靚正，
加埋我至愛嘅老干媽，
即刻胃口大開，
我食咗2碗米粉呀!
前兩日買咗半隻燒鴨返嚟，
我和老公食極都仲有半盒，
最後我買咗個涼瓜返嚟，
炆咗一大碟豉汁涼瓜炆燒鴨，
有涼瓜老公即刻添飯又添餸，
清哂果半盒燒鴨呀!
噚日母親大人攞咗D菜乾俾我，
今日就買齊材料煲湯，
金銀菜咸鴨腎紅蘿蔔煲豬腱，
配陳皮、南北杏、瑤柱和蜜棗，
呢個湯有清熱潤肺、止咳生津和通便利水等功效架!
今日陪大魔怪女朋友仔嚟沙田辦事，
順便約埋母親大人一齊食午飯，
我哋約咗又嚟唐宮小聚，
2隻乳鴿、黑松露蝦餃、蔥油拌麵、
冰鎮咕咾肉、鮑魚麻辣燒賣、
紅寶石粉果、牛肉叉燒和酸菜龍躉片，
呢餐老公請飲茶，
承惠$929。
噚日點解又返惠州???
因為屋企中間房冷氣機壞咗，
上星期師傅已經嚟過檢查，
佢話零件壞咗要貨到先換到；
師傅微信我噚日星期一下午4點過嚟整呀!
我哋返到惠州屋苑附近食茶餐廳。
今日父親節，
大小魔怪和大魔怪女朋友仔，
請我倆老食父親節午餐，
小魔怪揀咗去元朗YOHO~Outback鋸扒，
叫咗個美國頂級斧頭扒套餐，
仲叫咗碟煎比目魚飯，
加埋飲品和加一，
呢餐食咗$2655.4。
噚日小魔怪WHF，
我唔知係咪有預感呢，
買咗豬腱和煲湯料，
又買咗個大薯仔，
簡單煮咗兩餸1湯，
蠔油薯仔炆雞翼、烚菜芯、雪梨竹蔗茅根海底椰湯。
今日係雪櫃摷到銀魚和魷魚乾，
拿拿臨買梅頭豬肉返嚟，
整咗呢碟銀魚魷魚蒸梅頭豬肉，
呢碟餸有海鮮味，
好送飯架!
6月9日星期一
今日我、老公和姑奶一行3人，
去咗深圳東門，
老公話要袪手上嘅斑，
我就順便去修腳啦!
之後就去咗東門市集食嘢，
呢度有冷氣，
坐得好舒服呀!
我叫咗拉麵，
即叫即拉，
好有韌度，
我覺得唔錯呀!
今日，
我和老公參加元朗義工慶回歸同心之旅活動，
前往深圳灣食午餐後，
就到深圳錦繡中華民族文化村遊覽，
睇大型民俗表演和民族服飾舞蹈歌舞。
今日天氣真係好熱，
係烈日當空下進行戶外活動，
唔係咁易架!
所以我哋有義工們選擇自費每人30人民幣，
搭園內遊覽車遊園呀!
好耐冇食豆豉鯪魚炒油麥菜呢個餸喇!
今日買咗半斤油麥菜苗，
加咗一罐豆豉鯪魚，
嘩，
呢碟豆豉鯪魚炒油麥菜苗，
真係好餸飯呀!
今日係大魔怪浸會大學碩士畢業，
我、老公和母親大人緊係要出席觀禮啦!
畢業禮後，
小魔怪和大魔怪女朋友放工後就過嚟影相，
佢哋影咗好多相，
我和母親大人就搵個地方坐下休息下。
未去參加畢業禮前，
我哋3個人先去又一城食譚仔三哥，
晚餐呢，
大魔怪請我哋去大圍圍方上陽樓食晚飯。
雪櫃有半個洋蔥和梅頭豬扒，
即刻拿拿臨攞出嚟，
整咗呢碟黑椒洋蔥豬扒，
做咗今日嘅晚餐呀!
今日煲五指毛桃牛大力伏苓粒湯，
配埋紅蘿蔔、粟米、豬腱、淮山、茨實、薏米和蜜棗，
全程煲咗2個半鐘頭；
呢個湯有袪濕、健脾和提高免疫力等功效架!
青椒炒肉絲，
我覺得青椒有草青味，
所以我就會先用蒜蓉炒青椒，
仲會加少少紹酒添，
之後再炒熟豬肉絲，
撈埋青椒炒埋一碟，
咁就食得架啦!
今日都係平常日子，
小魔怪全日WFH，
老公就約咗中學老師和同學茶聚，
所以簡單煮咗餃子做午餐；
晚餐就滾咗節瓜咸蛋肉片湯，
麵豉蒸腩排和灼菜芯。
